Служба сщмч. Илье Четверухину

(память 5/18 декабря)

На «Господи воззвах» – стихиры на 8, глас 2, подобен «Егда от древа»:

Из глубины воззвах:

Егда Николаю богобоязненну/ С высокородною Мариею супружницею/ Удвои Господь благословение паки сына рождеством,/ Нарекают того огнепаляща пророка именем,/ Да от силы возрастая в силу разумом,/ О учении и богопознании первенствуя –/ Среде тьмы неверствия и суемудрия/ Возвысит одинокий исповедания глас// Богоизбранный Илия-отрок: се – аз верую!

Да будут уши Твои:

О науках внешних изрядствуя усердием,/ Чуткоблагочестивою душею внимая Промыслу,/ Обретаеши, о Илие, невесту благородну о жизни и имени,/ О писаниях тя уязвляющу святых отец,/ Да исправите общий путь вам на духовныя стези,/ Да Варнавы преподобнаго прозорливым вдохновением,/ Паки старца Зосимовска благословением святым/ Единогласно от алтаря и клироса// Всею жизнию славночестно воспоете: верую!

Аще беззакония назриши:

Се оставихом вся и по Тебе идохом, Господи, -/ Возглашает апостольски чета избранная/ Освящая дом, великий боголюбием,/ Яко ангельским посещением исповедник будущих и мученик:/ Се удел благословенный во дворех у преподобнаго Сергия,/ Се – по образу отеческу молитвенно восхождение/ О терпении друг друга тягот крестоноснем/ К небосветлым вершинам смиренномудрия,// Любовию сияющих и совершенною верою.

Имене ради Твоего:

Се покоя столп обрет пророчески жену всемудрую,/ На столпе истинне утверждаешися – Церкви Божией,/ О священнем ти Залоге апостольски ревнуя,/ Восприим же от Пастыреначальника благаго икономства дар,/ На служение первее послан всеснисхождения,/ Богадельник искусен являешися измлада, о Илие,/ Немощных врачуя, оскудение тех надежды восполняя милостию,/ В нюже сердце погрузив, обретаеши Всемилостиваго -// Якоже Сирианин Исаак учит – познаеши сие верою.

От стражи утренния до нощи:

Егда удручена сиротством Толмачевска паства// Взыска детоводителя си ко Господу и отца,// Се добра тя избирает молитвенника и стража неусыпна.// Идеже бо яко ангел просия служением любезный ти старец,// Ныне - слова ревнителю, паки устава церковнаго -// Деннонощно блюдеши рабы Божия, не преклоньшия колена// Яко Ваалу нову – хитростну духу разслабления.// Се же мзда Илии-пастыря – заточение Бутырок лютых,// Несмущенным того исповеданием печатлеемо: аз верую!

Яко у Господа милость:

Духом присно свободь сый, от темницы возвращаяся во своя,// Паче порабощаеши ся душ возделанию, Божий узниче Илие,// Братолюбным состраданием прерасширяя сердце,// В немже скорби ближних ти нетесно погружени,// Утоляются благодатию Христа-Господа,// Новую ти указующа жития стезю храма заключением,// По временнем утешении от собрата любоприимна,// На изгнание тя конечно Вседержавно благословляюща,// Лобызающу ти десницу Божию верою.

Хвалите Господа вси языцы:

Сосыланием досязаеши края дебри Пермския,// Страданием крайним освященней новых мученик,// Се – и ти вверяется, Илие, тех крест сонести,// Се – от присных неволию удаляется супруг и отец,// Се – и пастырь от овец разлучен милости неведущими -// Но не весть изгнания всельник Божия земли:// Молитвою единяется с присными и паствою,// Паче же душу полагает о возлюбленных,// На Голгофу по Господе и святым восходит верою.

Яко утвердися милость Его на нас:

Удручен истощанием крайним, многострадальне Илие,// О стяжании радееши духомирна устроения// Всех лишивыйся, всеми обладаеши,// Огнь премирен внутрь имый, духопророчествуеши,// Яко готов есмь ко огню за Христа,// Всесожжением убо Ся Пожершему о нас// Ся возносиши, яко огненный пророк жертву о всех,// Духа веянием тонким прохлаждаешися вечне,// Дерзновения исполнь о Господе совершенною верою.

Слава, глас 3:

Илие, о Господень трудниче,/ Илие, дома благословенна глава,/ Илие, о возлюбленне пастырю,// присно ходатайствуй о чтущих тя.

И ныне: Богородичен гласа

Вход. Чтений 3:

Притчей чтение

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку, и блажен человек, иже пути моя сохранит. Исходи бо мои – исходи живота, и уготовляется хотение от Господа. Сего ради молю вас и предлагаю мой глас сыновом человеческим: яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим и проста обретающим разум. Научу бо вас истине, да будет о Господе надежда ваша, и исполнитеся Духа.

Премудрости Соломони чтение

Праведник аще постигнет скончатися, в покои будет: осудит же праведник умираяй, живущия нечестивыя. Узрят бо кончину праведнаго, и не разумеют, что совещаша о нем: яко повержет Господь нечестивыя безгласны ниц, и поколеблет их от оснований, и до последнего исчезнут в болезни, и память их погибнет. Приидут бо в помышление согрешений своих ужасни, и обличит их сопротив беззакония их. Тогда станет в дерзновении мнозе праведник пред лицем оскорбивших его, и отметающих труды его. Видевше же его смятутся страхом многим, и ужаснутся о преславном спасении его. Рекут бо в себе кающеся, и в тесноте духа воздохнут, и рекут: сей бе, егоже имехом некогда в посмех, и в притчу поношения безумнии. Житие его вменихом неистово, и кончину его безчестну. Како вменися в сынех Божиих, и во святых жребий его есть; убо заблудихом от пути истиннаго, и правды свет не облиста нам, и солнце не возсия нам. Беззаконных исполнихомся стезь и погибели, и ходихом стези непроходны, пути же Господня не разумехом.

Премудрости Соломони чтение

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их: и еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено, и вмале наказани бывше, великими благодетельствовани будут, яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их, возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиися Нань, разумеют истину, и вернии в любви пребудут Ему, яко благодать и милость в преподобных Его, и посещение во избранных Его.

На литии стихиры, глас 7:

Болезнуя сердцем пастырским/ об овцех, горце разсеянных,/ давидски стеня, изгнанниче,/ се зовеши ко Спасу, о Илие:/ внидоша воды слезныя до души моея,/ да не постыдятся о мне терпящии Тебе, Господи,// ниже да посрамятся ищущии Тебе.

Се лишихся аз, Господи, полусердца ми -/ голубице моя, зрак яви твой,/- се – младенец хвала Ти мне неслышима есть./ Сам утеши своих ми, Сам хвалою исполнь,/ сих приим стенания, пети Сам отверзи уста:/ яко чудно имя Твое по всей земли,// яко взятся великолепие Твое превыше небес.

Поношения поносящих, Боже, Тебе/ нападоша на мя, раба Твоего,/ воздыхаеши терпеливейше,/ аз же, Спасе, к Тебе молитвою:/ не забуди, услыши мя в милости,// се бо время приспе благоволения Твоего.

Слава, глас тойже: Се течение совершается,/ Илие, о агнче и пастырю,/ исполняеши дух псалмопением:/ услыши мя, Господи, яко блага милость Твоя,/ поношение претерпех Тебе ради, Святый,/ вонми души моей и избави ю,/ среде горьких работ мир премирен стяжав,/ не смутихся отнюд, уготовихся сожжещися Ти:// спасение Твое да приимет мя.

И ныне, глас тойже: Разверзающуся на Руси лихолетию,/ плачем вдов и сирот преисполнену,/ четверицею сирот, сокрушенною вдовицею/ неутешней земли приложися,/ всесожжением взяту, святе, от долувлекущих ти;/ в небе ж Русском звезда возсияла нова есть./ Нам же, светом молитв твоих просвещаемым,/ вложи, отче, в уста покаяния песнь:/ Свят, Свят, Свят еси, Боже Праведне,// Богородицею помилуй нас.

На стиховне стихиры, глас 2, подобен: «Доме Евфрафов»:

Земле свята, первопрестольная,/ славою отец сияющая,/ плод приими усердна трудника/ славу нову ти слагающа// Илию священномученика.

Праведник, яко финикс процветет:

Церковь Русская,/ новомученик Святая Мати,/ дерзновение возслави,/ чада ти любезнаго:// Илии священномученика.

Насаждени в дому Господни:

Соборе исповедник и мучеников новых,/ земли нашея и Церкве злато,/ возблистай талантом днесь,/ огнеочищенна мирне волею// Илии священномученика.

Слава, глас и подобен тойже: Николаю светочу всемирну,/ верна бывша на земли служителя,/ покровену Царицею Небесною,/ о народе нове сомолитвенника тем,// Бог являет Илию священномученика.

И ныне, глас тойже: О чудесе новаго…

Тропарь, глас 4:

Благочестием семьи изрядствующую главу,/ Возводящу в горняя по себе чада Божия,/ Огнепальною блистающу ревностию,/ Всесожжение мирно Господеви,/ Злато Церкве преискушенное,/ От сокровищ небесных умоляюща о нас -// Илию священномученика любовию воспоим.

НА УТРЕНИ

По 1-м стихословии седален:

В смирении воспитай, святый пастырю, терпением утверди, отче, милосердию чада настави твоя, да в вере утвердимся, надеждою окрилени, неложней убо достигнем любве .

Слава и ныне: Смирения глубино, терпения крепосте, Милосердия Мати Чистая,- не презри ны, непотребныя рабы Твоя.

По 2-м стихословии седален:

Клеветы человеческия и напрасныя смерти избави ны, отче, яко воистину несть студа уповающим на молитвы святых, искушенных по всяческим.

Слава и ныне: Тобою дерзаем и Тобою хвалимся, Тебе поверяем беды и скорби наша, яко Покрову премирну и спасения Ходатаице.

По полиелее седален, гл.2:

Любокнижна ритора,/ устава церковна ревнителя,/ савваита мысленна,/ страданием достигша разума совершенна,// огнедохновенна мученика,/ присно ходатайствующа о нас,// воспоим Илию о, вернии./

Слава и ныне: Любочестну Матерь,/ о спасении чад присноревнующу,/ праведник надежду и мученик похвалу/, мироходатаицу Мариам// – превознесем, о вернии/

 

Проки́мен, глас 4: Проидо́хом сквозе́ о́гнь и во́ду,/ и изве́л ны еси́ в поко́й.
Стих: Разже́гл ны еси́, я́коже разжиза́ется сребро́

По Евангелии стихира, глас 6:

Святым иже суть на Руси Святей,/ новомучеником преславным/ удиви Господь хотение Свое,/ еже Церковь Русскую возродити/ дерзновенным сих ходатайством;/ сего ради о уделе своем умоляющу/ Илии пречудному возопиим:// радуйся, новый священномучениче!

Канон, глас 7, егоже краегранесие:

Благаго иконома и мученика огнеискушенна воспеваю Илию.

Песнь 1

Ирмос: Ма́нием Твои́м/ на земны́й о́браз преложи́ся,/ пре́жде удоборазлива́емое водно́е естество́, Го́споди:/ те́мже немо́кренно пешеше́ствовав Изра́иль,// пое́т Тебе́ пе́снь побе́дную.

Святый священномучениче Илие, моли Бога о нас:

Богат сый о милости, Илие,/ отверзи смиренныя ми уста,/ да подвиг твой о Господе славлю,/ и победную Тому песнь// о тебе пою.

Святый священномучениче Илие, моли Бога о нас:

Любоблагочестие отче от пелен наследствуя,/ паки и высокородство матерне,/ отроче Божий Илие,/ дерзновением пред миром// исповедуеши Бога и Царя всех.

Святый священномучениче Илие, моли Бога о нас:

Аз брату моему и брат мой мне,/ вопиет от премудра невеста твоя, Илие,/ чистым желанием// в горняя увлекая тя.

Святый священномучениче Илие, моли Бога о нас:

Гефсиманска скита светоч/ и Герасим чудный,/ паки Божия таинник жребия Алексий/ благословением зрят вас яко малую церковь// таже велий подвижничеством дом.

Слава: Авве Исааку – о писаний того рачение,/ Алексию-старцу – послушание совершенно:/ се же путь непорочен,/ возводяй Илию-трудника на степень священства,// силою Божиею тому яве препоясующуся.

И ныне: Глас малый прорекла еси/ яко Раба Господня,/ превелию обрела еси благодать/ по глаголу архангелову,/ ныне убо гряди, Избранная,// да родиши Избавльшаго нас от клятвы.

Песнь 3

Ирмос: В нача́ле небеса́/ всеси́льным Сло́вом Твои́м утвержде́й, Го́споди Спа́се,/ и вседе́тельным и Бо́жиим Ду́хом всю́ си́лу и́х,// на недви́жимем мя́ ка́мени испове́дания Твоего́ утверди́. 

Святый священномучениче Илие, моли Бога о нас:

О утешении малодушных тщание твое,/ о немощных заступлении преусердие:/ о всех долготерпиши,/ добрый о служителю Троицы,// от зачала пресвитерска ти, святче, подвига.

Святый священномучениче Илие, моли Бога о нас:

Испытание досязает тя со присными, Илие,/ токмо зачинающуся лихолетию,/ богадельну дому горце заключаему,/ но и во гладе хлеба упование не скудеет вам,// от словес питающимся Божиих и святых отец.

Святый священномучениче Илие, моли Бога о нас:

Кирилла смиренна о житии и имени,/ осеняешися благословением, Илие,/ среде бурь мирских тихую обретаеши гавань,/ кормило нова ти корабля крепостию держа,/ Николы Милостива и Пречистыя// утверждаяся молитвами.

Святый священномучениче Илие, моли Бога о нас:

Обвеян молитвою Алексия-старца,/ Духосошествен храм яко толмача Божия сретает тя, Илие,/ глаголы святых отец изъясняюща,/ о благодати нову привлекающа паству,// неустанным ю воспитуя служением.

Слава: Незазорну супругу обрет, отче Илие,/ яко матерь чадолюбиву лицезриши ю,/ паки и соработницу ти о Господе,/ да ведением и чувством/ благолепия служб церковных/ на молитву соподвизаете// люди Божия присно.

И ныне: О Всепомощнице Пречистая,/ клятву разрешити Адамову,/ слезы же Евины утолити/ грядеши в Вифлеем,/ паки немотство греха уставити// славословящих Человеколюбца.

 

Седален, гл.2:

Бутырок лютых сугубое прошед поприще, Илие,/ трегубыми дары любви о смиренномудрии обогатился еси,/ се же поминай пред Господем// возлюбивших тя, священнострадальче.

Слава и ныне: Священников доброто и мучеников похвало,/ Покрове миру всему, Богородице,// чад земных не остави, Мати Небесная.

Песнь 4

Ирмос: О́тча не́дра не оста́вль,/ и соше́д на зе́млю, Христе́ Бо́же,/ та́йну услы́шах смотре́ния Твоего́,// и просла́вих Тя́, Еди́не Человеколю́бче.

Святый священномучениче Илие, моли Бога о нас:

Многими словесы тя воспети дерзнувшим,/ обаче скоро оскудевающим,/ от елея богомудрых твоих глагол, о Илие,// нам восполни светильницы.

Святый священномучениче Илие, моли Бога о нас:

Алексию прелюбезну ти наставнику/ слово хвалы простираеши, Илие,/ триедину воспевая старца благодать,// юже в мудрости и любви со смирением зриши.

Святый священномучениче Илие, моли Бога о нас:

И нраву быти причастником,/ и о подвизе праведником уподобитися/ - се – и ныне возможно есть/ – тако возглашаеши, Илие,/ паки слово дерзновенное печатлееши// непорочным житием.

Святый священномучениче Илие, моли Бога о нас:

Мертва без дел по апостолу вера есть/, темже возставляеши, Илие,/ грехолюбием успнувшия,/ от огня твоего воспламеняя в сердцах// искры Божия.

Слава: Удаление ся от Таин Святых/ грехолюбныя ради нечистоты,/ яко богопротивну дерзость обличаеши, Илие,/ се бо опытне свидетельствуеши,/ яко покаянием исполненным житием// водворяется в сердце Господь.

И ныне: Чистая Мати Всепетая,/ вся верныя собираеши,/ иже от простых и премудрых,/ в Вифлеем песнопети Тя,/ Сыну же Богокрасному звати//: слава силе Твоей, Господи!

Песнь 5

Ирмос: Но́щь несветла́ неве́рным, Христе́,/ ве́рным же просвеще́ние в сла́дости слове́с Твои́х./ Сего́ ра́ди к Тебе́ у́треннюю,// и воспева́ю Твое́ Божество́.

Святый священномучениче Илие, моли Бога о нас:

Единение исповеди с покаянием/ проповедуеши, Илие мудре,/ да насилия греха избегнем,/ да одеяние души о церковнем измывше таинстве/, чистотою облечемся// жизни новыя о Христе.

Святый священномучениче Илие, моли Бога о нас:

Не нуждею привлекает к Себе Господь,/ не насильством горьким,/ но тонко души касаяся/ паки словом утверждая жизни,/ умилением исполняет свободен дух:// тайнозриши сия, о Илие, и свидетельствуеши.

Святый священномучениче Илие, моли Бога о нас:

И о бедах, и о соблазнах лютых,/ и о всех благодарение, дея и уча,/ Спасу возносиши, о Златоусте новый Илие:/ возлагаеши вся в руце Божии,// блаженство в оных обретая истинно.

Святый священномучениче Илие, моли Бога о нас:

К памяти Божией зовеши верныя/ словом Феофана святителя, Илие,/ вся грехи яко сучцы вменяеши евангельски// пред бревноподобным осуждением.

Слава: Аще любите Мя слово Мое соблюдите/ – сице Господь учит,/ паки и Илия о дражайшем Христу ревнует,/ любовию зовя Тому,/ еже Ти да приведу, Спасе,// ихже дал ми еси.

И ныне: О смирения богоподобна!/ О чистоты, о любви, Дево-Мати!/ Ныне к Вифлеему нас ради тщишися,/ красно родити Отроча// и Бога превечна!

Песнь 6

Ирмос: Плавающаго в молве житейских попечений,/ с кораблем потопляема грехи/ и душетленному зверю приметаема,/ яко Иона, Христе, вопию Ти:// из смертоносныя глубины возведи мя.

Святый священномучениче Илие, моли Бога о нас:

Гласу совести яко Божию/ внимати не возжелехом,/ яко жизни изменения страшимся,/ сего ради от уныния горька возстати несильны есмы,/ но да воспрянем желанием,/ слову твоему огнеобличительну, Илие,// внимающе.

Святый священномучениче Илие, моли Бога о нас:

Небес притвор, сиречь земна юдоль,/ приемлет всякою немощию духовною обложенных,/ якоже древле Вифезда-купель./ Сего ради да уготовимся к сретению Царя Небесна,/ немощи наша Тому исповедающе,// слову твоему, святе Илие, внимающе.

Святый священномучениче Илие, моли Бога о нас:

Еда дреманием содержим есть Господь,/ внегда скорбети нам, обуреваемым отчаянием/ – ни, никакоже!/- отвещаваеши опытом, Илие,/ духа бодростию ко Христу/ - в сердцевине бури стоящу// - путь указуя всем.

Святый священномучениче Илие, моли Бога о нас:

Исполнен разума духовна сый,/ слова благодатию облистан, Илие,/ яко некий талант, ввергаеши сия в сердца верных ти/, из нихже, яко благой сокровищницы,/ плоды извлекаеши духа,// иже есть любы и радость и мир, по апостолу.

Слава: Самоотвержения правило,/ душепопечения образ,/ всякою пастырскою добродетелию украшена/ чисте зрит тя благодарная, Илие, паства твоя/ – се блаженный Божию иконому итог,// се же к высшему звание подвигу.

И ныне: Камо идеши, Чистая?/ Чесо ради течение совершаеши?/ Сына родити Превечна гряду в Вифлеем,// да клятвы избавит Адама с праматерию.

 

Кондак, гл.6:

Пастыря всеизрядна Толмачевска,/ Бутырска благосердна узника,/ терпеливодушна изгнанника за Христа,/ мирнаго духом мученика,/ Илию восхвалим// неусыпающа о нас ходатая.

Икос:

Кто, достохвальне Илие ,/ изречет труды твоя и болезни,/ яко и среде утеснений лютых/ о служении Божием усердствуеши,/ паству к истинному житию во Христе воздвизаеши,/ первее словом уча,/ по изгнании же крайним терпением наказуя,/ и тако дух мирен стяжал еси, отче святый,/ во всесожжение ся принес,/ вселюбезных ти небесных высот достигл еси./ Сего ради сыновне любовию восхваляем тя,// яко неусыпающа о нас ходатая.

 

Песнь 7

Ирмос: Пе́щь о́троцы огнепа́льну/ дре́вле росоточа́щу показа́ша,/ Еди́наго Бо́га воспева́юще, и глаго́люще:// превозноси́мый отце́в Бо́г и препросла́влен.

Святый священномучениче Илие, моли Бога о нас:

Уязвлен молитвою Спасовою ко Отцу,/ на себе сбывшееся слово зриши Евангелия,/ се бо поистине прославль Господа на земли,/ о сродных по духу пред Ним присно печалуяся,/ паче к Тому грядя мироизгнанием, Илие,// от близости крайней Сего, умолкаеши.

Святый священномучениче Илие, моли Бога о нас:

Шлем спасения восприим, Илие,/ вооружен мечем слова Божия,/ несмущением благословляеши си заклепы темничныя,/ яко и на горшая уготовлен еси,// духа доблестию, о Христов воине.

Святый священномучениче Илие, моли Бога о нас:

Егоже возлюбил еси,/ Егоже возжелел еси,/ трепетом души, о изгнанниче/ Того ради и тело неневолию изнуряеши,/ се – до Пермских лесов пешешествует мирне раб// крестным путем Владыки.

Святый священномучениче Илие, моли Бога о нас:

Неясыти пустынней подобяся,/ плачем о присных ти растворяеши питие,/ ся готовый о чадех уязвити самозабвением, о Илие,// вся обаче поверяеши Изъязвлену о нас.

Слава: Не о присных ти токмо богоутешении,/ ниже о литургисании радостотворне,/ но среде горьких работ/ славу Христу возносиши истощанием о всех,/ сему же свидетельница ти дражайшая// – яко голубина почта.

И ныне: Аннина яже от неплодства Дщерь/ чревоносит ныне Безсеменно Рождество,// - взыграйте, людие, песнопоюще.

Песнь 8

Ирмос: Неопальная огню в Синаи причащшаяся купина,/ Бога яви медленноязычному и гугнивому Моисеови,/ и отроки ревность Божия три непреоборимыя во огни певцы показа:/ вся дела Господня Господа пойте,// и превозносите Его во вся веки.

Святый священномучениче Илие, моли Бога о нас:

Взысках тя брате мой - не обретаю тя,/ - голубица со птенцы болезнует, -/ Ангел твой да хранит тя, благослови нас/ - вся терпети ми неневозможно есть,// не довлеет токмо лицезрети тя.

Святый священномучениче Илие, моли Бога о нас:

О любезная ми, о голубице моя!/ Аще волию воздохнул бы есмь о мгновении,/ вся бы думы мои возлетеша до вас./ Вся терпети ми неневозможно есть:// не довлеет токмо лицезрети тя.

Святый священномучениче Илие, моли Бога о нас:

Се же вижду тя, брате, - слава Богу о всех,-/ истязания ти небезвестны ми есть./ Слава Богу о всех,- отвещаю ти,/ - о сестро-голубице, мир храни: се Господь есть близ./ Се же вкупе речем:// слава Богу о всех!

Святый священномучениче Илие, моли Бога о нас:

Пламенея серафимски духом,/ лютый утоляеши мраз, о Илие чудне,/ устроением миродушевным сретая огнь,// возносяяй до Солнца тя правды.

Благословим: Еже жити Христос ти бысть, Илие,/ темже смерть духопламенна ти есть приобретение,/ да вселишися, идеже Жизнь жительствует,/ со Златоустом воспевая вечне// славу Богу о всех!

И ныне: Велий Господь наш,/ и велие Твое дерзновение к Нему, о Мати,/ бренная нам отверзи уста,/ да благословим Раждаема// и превозносим Его во веки вся.

Песнь 9

Ирмос: Не тле́ния искуше́нием ро́ждшая,/ и Всехитрецу́ Сло́ву плоть взаимода́вшая,/ Ма́ти неискусому́жная Де́во Богоро́дице,/ Прия́телище Нестерпи́маго,/ Село́ Невмести́маго Зижди́теля Твоего́,/ Тя велича́ем.

Святый священномучениче Илие, моли Бога о нас:

Алексиева духа наследниче,/ среде мира соблазн руководствуй ны,/ да Божественныя не лишимся десныя страны,// Илие, о печальниче наш.

Святый священномучениче Илие, моли Бога о нас:

Юность настави правдою,/ зрелость ревнованием утверди,/ старость утеши о Господе,// Илие, о ходатаю наш.

Святый священномучениче Илие, моли Бога о нас:

Иисусов светлообразен Лик,/ кистию описавый трепетною,/ да в сердцах яснопечатлеется той,// любоискусне Илие, новый светочу наш.

Святый священномучениче Илие, моли Бога о нас:

Любящих тя помяни,/ уповающих на тя не забуди,/ просвети же всех словом правды и милости,// да последуем Господу по стопам святых.

Слава: Имя славно твое, светло житие/ – прости убожество словес,/ духа восполни оскудение,// Илие святе отче наш.

И ныне: Юница Божия/ о страдании стенет новомученик,/ паче же ликует о небесней тех славе,// яко Мати сущи Господня.

Светилен:

Светом богоразумия возблиставый/ в житии и слове, Илие пречудне,/ омраченныя наша озари сердца,// умоляя присно Животворящаго Духа

Слава и ныне: Се раба Господня,/ - рекла еси ко Архангелу, Чистая,/ - и мене сим смирением просвети// - снисхождением Духа.

На хвалитех – стихиры 4, глас 5, подобен: «Радуйся»:

Хвалите Его на силах Его:

Радуйся, Илие, имя издревле славное,/ Подражавый небесному ти покровителю/ Ревностию святою о богопознании,/ Паки неослабевающим усердием/ О возрастании в опытнем смирении/ Паствы ти поистине возлюбленней,/ Юже, в подражании великому Минятию,/ Укреплял еси среди гонений лютых// Словом пламенновдохновенным./

Хвалите Его во гласе трубне:

Радуйся Илие, святых воспитание,/ Благодать стяжавый верна ученичества,/ Слово преподобных всемудрое/ Крайним ти вниманием усвоивый,/ Сего ради рассуждение духовное/ Святоунаследив, пастырством явивый,/ Паки дар сей многоусугубивый,/ Исполняя слово разумом высокое// Житием пламенновдохновенным.

Хвалите Его в тимпане и лице:

Радуйся, Илие, исповедников друже и мучеников,/ О житии Исаака-свята соработниче Михаилу дивному,/ Приемый благословение нововсельну дому твоему/ От Николая будуща святителя Казахстанска,/ Звездоименну же Серафиму соблистаяй премудростию,/ Маккавеевску Александру тайны воскресения проповеданием,/ Любовию устава церковна Сергию, иже от Никитников,/ Паки Игнатию священнострадальцу единою ревностию,// Иже к подвигу влечет пламенновдохновенну.

Хвалите Его в кимвалех доброгласных, хвалите Его в кимвалех восклицания:

Радуйся, Илие, винограда Господня трудниче,/ Отребивый терны миролюбия,/ Землю благу сердца тихослезно орошая,/ Яко плод сторичный духа возрастанием/ Преимущ всяк ум стяжал еси мир Христов,/ Восприим же сей хлада тонка глас,/ Серафимски возгараяся любовию премирною,/ Совершенне всесожжеглся еси Господеви// О исходе ти пламенновдохновенне.

Слава, глас 8: Страдание есть богатение души,/ утешение же – трата,/ - сице премудрая ти супруга рече,// - о, Илие, смиреннопроповедниче Христов, восхотевый доли последнейшия, яко райских цветов навоз вменивый ся, обрелся еси светочем ясным, солнцезрачне сияющим в Царстве Отца ти Небеснаго.

И ныне, глас тойже: Владычице, приими молитвы раб Твоих, и избави нас от всякия нужды и печали.

Просмотров: 2044