Храм Живоначальной Троицы
Служба сщмч. Василию Смирнову
Память 1 июля
Церковный календарь
По предначинательном псалме,
Блажен муж: 1-й антифон.
На Господи воззвах: стихиры, глас 2.
Подобен: Егда от Древа:
Законы Превечнаго уясняя, о Василие, / поучая тем и проповедуя, / Слова Божия таланты собирал еси / во благой сокровищнице сердца, / умножая сия учительством, / сего ради и призывает тя Христос / на служение священное, / да возсияет тобою верным // богоразумия нетленный свет.
Не мню, глаголет Златоустый, / иереем многим спасенным быти. / О сем прилежно помышлял еси, Василие, / посему не взыскал еси сам скорейше священства, / обаче призванию Господню повинуяся, / благодать пресвитерства восприемлеши, / и благаго икономства дар, / в немже является таинственно // богоразумия нетленный свет.
Присным во едином Господе не бывает разлучения: / аще бо и семьи удаляешися, о Василие, / да не постраждет супруга со чадами / от священноненавистников лютых, / но по образу матере Моисеове / доверяеши сродных Богови, / да преплывше жития сего мысленный Нил, / вкупе достигнете плодоносныя земли райския, // идеже блистает богоразумия нетленный свет.
Внимая себе и стаду, / в немже Бог постави тя пастыря, / откликался еси сердцем чутким / на боли без меры страждущих, / яже в сицевое время лютое без меры умножишася, / и тако душу твою, Василие, уготовал еси / ко искушению лютейшему темницею, / в нейже возсия терпеливодушию твоему // богоразумия нетленный свет.
Слову Божию и деянием любве / не бывает заключения — / тако помышлял еси, Василие, — / аще бо и проповедь молчит, / и доброделанию во узах места не обретается, / обаче усугубляются молитвы, / и в души смирившейся христоподражательне / слышимь есть благодати глас, яко хлада тонка, // иже есть богоразумия нетленный свет.
Слава, глас и подобен тойже:
Бог приобщися ми и аз по силе Ему, — / взывал еси трепетом Василие, — / Бог пострада за мя, и аз за Него стражду, / Бог из мертвых возста, да и аз воскресну / к некончаемей жизни в Дусе Святе. / Но Родивыйся мене ради и Умерый, / воскресение даруй духу моему, / да во веки наслаждуся // светом нетленным богоразумия.
И ныне: Боголюбской.
Вход. Прокимен дне и чтения 3.
Обратися от небесе, Господи, и виждь от дому святаго Твоего и славы Твоея: / где есть ревность Твоя и крепость Твоя? / Где есть множество милости Твоея и щедрот Твоих, яко терпел еси нам, Господи? / Ты бо еси Отец наш, яко Авраам не уведе нас, и Израиль не позна нас, / но Ты, Господи, Отец наш, избави ны, яко изначала Имя Твое на нас есть. / Почто уклонил еси нас, Господи, заблудити от пути Твоего? / Ожесточил еси сердца наша, еже не боятися Тебе? / Обратися раб Твоих ради, племен ради наследия Твоего. / Да помале наследствим гору святую Твою. / Противницы наши попраша святыню Твою. Быхом яко от начала, егда не владел еси нами, ниже назвася Имя Твое на нас. / Аще отверзеши небо, трепет приимут от Тебе горы и растаются, яко воск от лица огня тает. / И попалит огнь супостаты Твоя, и явлено будет Имя Твое противным Твоим. / От лица Твоего языцы возмятутся. Егда сотвориши славная, трепет приимут от Тебе горы. / От века не слышахом, ниже очи наши видеша Бога, разве Тебе, и дела Твоя истинна, и сотвориши терпящим Тя милость. / Срящет бо милость творящия правду, и пути Твои помянут. / И ныне, Господи, Отец наш Ты еси, мы же брение; и Ты Создатель наш, и дела рук Твоих вси мы. / Не прогневайся на ны, Господи, зело, и да не помянеши во время грехов наших; / и ныне призри, Господи, яко людие Твои вси мы.
Премудрости Соломони чтение:
Праведник аще постигнет скончатися, в покои будет. / Осудит же праведник умираяй живущия нечестивыя; / узрят бо кончину праведнаго и не уразумеют, что усоветова о нем, и во что утверди его Господь: / приидут бо в помышление согрешений своих ужасни, и обличит их противу беззакония их. / Тогда станет в дерзновении мнозе праведник, пред лицем оскорбивших его и отметающих труды его. / Видевше же его смятутся страхом многим, и ужаснутся о преславном спасении его. / И рекут в себе, кающеся: / сей бе, егоже имехом некогда в посмех и в притчу поношения. / Безумнии, житие его вменихом неистово, и кончину его безчестну. / Како вменися в сынех Божиих, и во святых жребий его есть? / убо заблудихом от пути истиннаго, и правды свет не облиста нам, и солнце не возсия нам. / Беззаконных исполнихомся стезь и погибели, и ходихом стези непроходны, / пути же Господня не разумехом.
Премудрости Соломони чтение:
Похваляему праведнику, возвеселятся людие: / безсмертие бо есть память его, / яко от Господа познавается и от человек, / и угодна Господеви душа его. / Возлюбите убо, о мужие, мудрость и поживете: / восхощите ея и наказани будете. / Начало бо ея любы и соблюдение закона. / Почтите премудрость, да во веки царствуете. / Возвещу вам и не скрыю от вас таин Божиих, / яко Той мудрости Наставник есть, и мудрых Исправитель, / и всякому смыслу и делу Хитрец. / И всем смыслом научит мудрость, / есть бо в ней Дух Разумен и Свят, / и сияние Света присносущнаго, и образ благости Божия. / Тая други Божия и пророки устрояет, / благолепнейши же есть солнца и паче всякаго сотворения звезд, / свету сосуждаема, обретается первейши. / Тая угождающих ей от болезни избави / и настави на стези правыя. / Даде им разум имети свят, / и сохрани я от ловящих, и подвиг крепок подаде им. / Да разумеют вси, яко сильнейше всего есть благочестие, / и никогдаже преможет злоба мудрости, / ниже прейдет злыя обличающи суд. / Рекоша же в себе, помысливше неправедно: / насильствуем праведному, и не пощадим преподобства его, / ни усрамимся седин старости многолетны. / Будет бо нам крепость закон / и уловим праведнаго, / яко неугоден нам есть, / и противится делом нашим, и поносит нам отпадение закона, / и обличает нам согрешения наказания нашего. / Возвещает нам разум имети Божий, / и отрока Господня себе именует. / Бысть нам на обличение помышлений наших и тяжек нам есть, / и видим, яко неподобно иным житие его, и изменены стези его. / В поругание вменихомся ему, / и удаляется от путей наших, яко от нечистот, / и блажит последняя праведных. / Увидим убо, аще словеса его истинна суть, / искусим, яже сбываются ему. / Руганием и мукою истяжем его, / да разумеем кротость его и искусим беззлобство его, / смертию безобразною осудим его, / будет бо посещение от словес его. / Сия помыслиша и прельстишася, ослепи бо я злоба их, / и не разумеша таин Божиих и не разсудиша, / яко Ты еси Бог Един, живота имеяй и смерти власть, / и спасаяй во время скорби, и избавляяй от всякаго зла. / Щедр и Милостив, и даяй преподобным Своим благодать, / и Своею мышцею гордым противляяйся.
Исполняются Духа пророчества / область темная злонеистовствует, / се терпения время, се страдания час, / се Василий стенет Спасу Господу, / оживающей во устех, в сердце, в дусе его // приснопеваемей Псалтири Давидове.
Нечестивых совет всегубительный, / вихрь Каинов, дух отступления / возметает прах смертный прельщенных душ / от лица святыя земли, Церкве Божия, — / се взывает Василий в смирении, — / Ты же, Господи, веси пути моя, // убо волю мою в законе Твоем укорени.
На Господа, на Христа Его, / на Церковь Святую Русскую / князи людстии собираются, / се воистину шатание суетно, — / вопиет Василий в терпении, — / яко стрелы младенец оных язвы суть, // се бо Живый на небесех поругается им.
Умножаются нам стужающии, / востающе на ны и глаголюще, / яко в Спасе — Бозе и Господе / несть спасения, ни заступления, — / аз же вем Тя, о Многомилостиве, — / вопиет Василий мужаяся, — / сего ради терплю поношение / и семьи разлучение нуждею, // яко Ты еси возносяй главу мою.
Слава, глас тойже:
Наказуя мя, наказуеши, / не предаждь убо душу гибели, / Сам избави ю, Сам очисти ю, — / се зовет Василий ко Спасу всех, — / дерзновением исполняяся, / искушен судищем, темницею, / воздыхает слезя мужемудренно: / имже веси образом злострадания // пред Тобою путь исправи мой.
И ныне, глас тойже:
Мати Дево Боголюбивая, / новомученик дерзновение, / мир Василию и собратиям его / от небесных высот низпославшая, / в час конечнаго испытания — / убиения в лютом Бутове, / в сладость вечнаго наслаждения, / в дар священнаго предстояния / за ны, горце грехми отягченныя, / не лиши покрова Твоих рабов, // яко Начальника тишины миру родила еси.
На стиховне стихиры, глас 2.
Подобен: Доме Евфрафов:
Земле Замоскворецкая, / святоувенчанными / храмы украшенная, / исплети похвал венец // святолепному Василию.
Стих: Праведник яко финикс процветет, / яко кедр, иже в Ливане, умножится.
Храме Знамения / Всецарицы Богородицы, / славным величайся подвигом / честнаго страдания // священнаго Василия.
Стих: Насаждени в дому Господни, / во дворех Бога нашего процветут.
Соборе новомученик, / злато Церкве Русския, / светло просияй днесь / таланта блистанием // святолепнаго Василия.
Слава, глас и подобен тойже:
Христозваннии людие, / бодрствуим в молитвах, / се бо ввери ны Господь / неусыпающу ходатаю, // священному Василию.
И ныне: Боголюбской.
Неложный учитель закона духовнаго / обличает поучения тщетным, / подвигом доблим священнострадания, / беззаконных же шатания посрамляет, / сего ради священство царственное приемлет на небесех / Василий прехвальный, // молитвенник о душах наших.
На Бог Господь: тропарь Боголюбской, дважды.
Слава: святаго. И ныне, Боголюбской.
По 1-й стихологии седален, глас 6:
Не лиши ны вразумления, отче, / усердием ослабевших / и паки заблуждших смыслом, // яко учитель благочестия богоданный.
Слава, и ныне: Боголюбской.
По 2-й стихологии седален, глас 6:
Моли Бога о нашей темности, / не лиши ны просвещения, / еже зрети волю Того о нас, / яко благую и совершенную, // о светоявленне Василие.
Слава, и ныне: Боголюбской.
Маловерием разслаблени, / скорбьми, яко непосильными, соугнетаемся, / сего ради к тебе прибегаем, отче наш Василие, / да верою укрепимся заступлением твоим, / и в терпение облечемся, // николиже постыжающее.
Слава, и ныне: Боголюбской.
Прокимен на утрени, глас 4:
Святым, иже суть на земли Его, / удиви Господь вся хотения Своя в них.
Стих: Предзрех Господа предо мною выну, / яко
одесную мене есть, да не подвижуся.
Евангелие от Матфеа, зачало 36.
По 50-м псалме стихира, глас 6:
Святым, иже суть на Руси Святей, / новомучеником преславным, / удиви Господь хотение Свое, / еже Церковь Русскую возродити / дерзновенным сих ходатайством, / сего ради о уделех своих умоляющу / Василию пречудному возопиим: // радуйся, новый священномучениче.
Канон, глас 4,
егоже краегранесие сице: Прославляющих тя помяни, отче Василие.
Песнь 1
Ирмос: Моря чермную пучину / невлажными стопами / древний пешешествовав Израиль, / крестообразныма Моисеовыма рукама // Амаликову силу в пустыни победил есть.
Плач на плач прилагает Василий ко Господу, прелагающу Тому плач теплый в победное пение.
Рекут безумнии яко несть Бог — Упование отец наших; возврати, о Сильне, пленение раб Твоих.
Омерзишася в начинаниих безчеловечнии: да не убоимся страха их, яко несть нам страха, разве Тебе, Судие Праведнейший.
Богородичен: Сиры не остави ны, овец взыскание, терпение пастырей, о Мати Агнца и Пастыря.
Песнь 3
Ирмос: Лук сильных изнеможе, / и немощствующии препоясашася силою, // сего ради утвердися в Господе сердце мое.
Лук зверонравнии напрягоша состреляти верныя Твоя: да свершатся нозе наши яко елени, на горней высоте утвержденнии.
Апостол увещавает немощи носити немощных: се любы Христова, еюже истлевающий мир осоляется.
Велий Господь наш, несть числа разуму Его, убо смиримся под руку Святаго Крепкаго.
Богородичен: Любовию воспоим, яже о Христе братие, и всеконечне упование возложим на Предстательницу нашу и Матерь Божию.
Седален, глас 6:
Овцы своя глашая по имени, / образ тем являя внимания Христу, / таже гласу Началопастыря последуя, / душу за паству положил еси, / о Василие предобрый пастырю, // паки и мучениче доблественный.
Слава, и ныне: Боголюбской.
Песнь 4
Ирмос: Вознесена Тя видевши Церковь на Кресте, / Солнце праведное, / ста в чине своем, / достойно взывающи: // слава силе Твоей, Господи.
Яко овощная хранилища вмениша храмы Твоя, Всецарю, ихже явил еси рукотворныя проповедники смирения Иисусова.
Юже Дом Богородицы именовахом, зрим ныне Русскую землю, яко вертеп разбойничь, се, увы, горькая измена десницы Вышняго.
Щедродателю Милостиве и Судие Всеистиннейший, виждь немощь и смирение наша, убо суд на милость преложи.
Богородичен: И древних гонителей злобою превозшедше отступницы богоборнии, рыкают львообразно на ны, не ведуще Тя, о Мати, Заступницу Боголюбивую.
Песнь 5
Ирмос: Ты, Господи мой, Свет в мир пришел еси, / Свет святый, обращаяй из мрачна неведения // верою воспевающия Тя.
Христос искушашеся, тако и во Христа облекшимся испытание предлежит, аще Словом живем, исходящим из уст Божиих.
Тьма и тартар ошуюю Судии, убо изберем Света десную часть, из мрачна неведения обращающа.
Яко отреби миру быхом, доселе попираеми есмы, восплачим зде со плачущими, да радость безконечную улучим.
Богородичен: Плач утоли гладом томимых чад, Словом Божиим мир насыщающая, о Питательнице алчущих.
Песнь 6
Ирмос: Пожру Ти со гласом хваления, Господи, — / Церковь вопиет Ти, — / от бесовския крове очищшися / ради милости от ребр Твоих // истекшею кровию.
О падения! о отступства окаяннаго! о дерзости неблагодарнаго народа Твоего! доколе терпиши, о Едине Долготерпеливе?
Мир глаголют быти и се мира несть, Патриарх со пророком вопиет, убо мира Твоего не лиши ны среди тли злопагубныя.
Яму ископаша верным Твоим, Спасе, в нюже да впадут врази Креста, аще несть покаяния им.
Богородичен: Непорочная, взыщи блудныя, укрепи терпящия, Необоримая, о усопших умоли, Неусыпающая, рая сподобляющи тех, о Нетленная.
Первее во учительстве изрядствуя, / таже и священства благодать восприим, / на небошественное поприще подвиглся еси, Василие, / житием и смертию проповедуя // мир Христов, всяк ум преимущ.
Икос:
Яко духовнаго воина и учителя всеизрядна, / обретохом тя, Василие отче наш, / вооружена мечем слова Божия, / подвигом же честнаго страдания шлем спасения восприимша,/ благовествующа новым чадом церковным // мир Христов, всяк ум преимущ.
Песнь 7
Ирмос: В пещи авраамстии отроцы персидстей / любовию благочестия паче, / нежели пламенем опаляеми взываху: // благословен еси в храме славы Твоея, Господи.
Искренним разлучение судиши, да прежде времене никтоже погибнет, якоже Сам, о Иисусе, дея учил еси.
О храме заключаеме люте безбожными неумолимыми, умолен буди, Иисусе Сыне Отечь, да поне правнуцы наши возродят его.
Тесноты душевныя горечь и судище злосоветное, паки и за веру смерть, аще благоволиши, Спасе, да не разлучат смиренный дух мой от любве пресладкия Твоея.
Богородичен: Чудес источниче Дево и Мати, миром напои истаявающия крепостию, да безчеловечных ополчения верою низложим.
Песнь 8
Ирмос: На Кресте плотию пригвожденнаго / и показавшаго нам оружие во спасение, // отроцы превозносите Христа, Бога нашего, во веки.
Емшим ны беззаконным, в дерзновении возопиим: аще и пастырей поразисте и овцы разсеяшася, но долготерпим, да поборет за ны Победитель смерти.
Внегда изгнание терпети во отдаленныя веси, везде Тебе обретаем, о Божественный Изгнанниче.
Авелеве сподоби, Иисусе, правде уподобитися, принести себе самаго в жертву чистую Тебе.
Богородичен: Се раба Господня, — рекла еси ко Архангелу, Чистая, и мене сим смирением просвети, снизхождением Духа.
Песнь 9
Ирмос: Сотвори державу мышцею Своею, / низложи бо сильныя со престол / и вознесе смиренныя Бог Израилев./ В нихже посети нас Восток с высоты // и направил ны есть на путь мира.
Исполняему житию исполняется плач Василиев, да исполнятся безвестная и тайная, Спасе, всеблагаго о нас Промысла Твоего.
Люто утеснение в житии, лютейше судилище безчеловечное, всех лютейше убиение без числа страдальцев в лютем и святейшем селе Русския земли — Бутове.
И рая наследник и блаженства онаго причастник быв, помолися тепле о воспевших подвиг твой, Василие.
Богородичен: Егда славнии новомученицы воздохнут о нас Богородице, уповаем Тою спасение улучити и возопити Благословенней: Яже о всех благая Мати, слава Тебе.
Светилен:
Хлад отогрей оляденевшия души моея / и тьму страстную разжени, Христе Светодавче, / Василия молитвами теплыми, // светлаго страдальца Твоего.
Слава, и ныне: Боголюбской.
На хвалитех стихиры, глас 5.
Подобен: Радуйся, Живоносный Кресте:
Радуйся, Василие предобре, / издетска чисте восприимый / Авелеву щедрость душевную, / Самуилово послушание, / жертвенность Исаакову, / прилежание в трудех Иаковле, / долготерпение Иосифово, / сего ради учение истины // запечатлел еси подвигом святаго жития.
Радуйся, Василие мудре, / зрел явивыйся от юности разумом: / не довлеяше бо ти внешним учение, / но духовных востязуя смыслы, / обрел еси реку премудрости в слове Божиим, / от неяже юных напаял еси, / да николиже вжаждут // в пустыннем знои мирскаго жития.
Радуйся, Василие пребогате, / Обнищавшему нас ради послуживый честне, / вверенныя ти люди ущедряя / призыванием милости Всещедраго, / да не одолеет сих уныния дух, / но держатся веры Вседержителевы / и паки надеждею на Того исполнени, / обретут любве пристанище утишное // среди ненадежнаго моря земнаго жития.
Радуйся, Василие прехвальне, / добре ведый, паче же проповедавый, / яко несть больши сея любве, / да кто душу чисте положит за други, / и сия крепчае уяснивый опытне, / егда подвигом страдания доблественнаго / исполнил еси меру возраста // Христа распятаго и воскресшаго.
Слава, глас 3:
Песнословим твое житие, / величаем страдания, / ублажаем и смерть за Христа, / надеждею укрепляемся / на отеческия молитвы твоя, // священномучениче Василие отче наш.
И ныне: Боголюбской.
На литургии
блаженны на 8: Боголюбской 4 и сии священномученику, глас 4:
Стих: Блажени есте, егда поносят вам, и изженут, / и рекут всяк зол глагол на вы, лжуще Мене ради.
Се святилища в запустении, / разграблению храмы преданы, / зрит Василий сие содеваемое, / плача зрит сему исполняющуся: / горше всех запустение душ людских, // совести их до конца сожигаемей.
Стих: Радуйтеся и веселитеся, / яко мзда ваша многа на небесех.
Cе не в мудрости человечестей, / ни в словесных хитросплетениих / истязуется любовь пастырская, / житием сие, Василие, свидетельствовал еси, / но в смирения истинней простоте, // еже всем вся быти, да спасти всяко некия.
Слава: Се приятием плоти сложился еси мне, / Иже прост естеством Сыне Божий, — / воздыхал еси Спасу, Василие, — / да и аз в простоте Ти послужу, / вкупе и словесному Твоему стаду: / и тако принесу посильный Тебе долг, // еже душу за Тя и тех положити.
И ныне: Се раба Господня, — / рекла еси ко Архангелу, Чистая, / и мене сим смирением просвети, // снизхождением Духа.
Прокимен, глас 7:
Восхвалятся преподобнии во славе / и возрадуются на ложах своих.
Стих: Воспойте Господеви песнь нову, / хваление Его в Церкви преподобных.
Апостол к римляном, зачало 99.
Аллилуия, глас 4:
Воззваша праведнии, и Господь услыша их, / и от всех скорбей их избави их.
Стих: Многи скорби праведным, / и от всех их избавит я Господь.
Евангелие от Иоанна, зачало 52.
О славне священномучениче Василие, отче наш богоданный и богопрославленный! К тебе припадаем, обремененнии грехми, к тебе взываем, скорбьми отягченнии. Воздохни о нас пред Спасом Христом, да не прогневается на нас, нерадивых и ленивых, прослези и пред Пречистою Материю Его, да пробавит милость Свою на нас и вседержавным покровом Своим да защитит нас от враг видимых и невидимых. Вемы тя, отче святый, изряднаго благочестия учителя, вемы тя яко добраго воистину пастыря, вемы тя и мученика доблественнаго. Сего ради, подвигом жития твоего озареннии, души наша предаем молитвенному заступлению твоему, ныне и присно и во веки веков. Аминь.
Просмотров: 3388