Служба сщмч. Иоанну Артоболевскому

Служба сщмч. Иоанну Артоболевскому

Память 4(17) февраля

На Велицей Вечерни

Стихиры на Господи воззвах – 8:
Празднику – 3, И святому – 5: гл.2, подобен *
Егда от древа*:

 

Имене ради Твоего:

Законы Превечнаго уясняя, Иоанне,/ Поучая тем и проповедуя,/ Слова Божия таланты собирал еси/ Во благой сокровищнице сердца,/ Умножая сия учительством,/ Сего ради и призывает тя Христос/ На служение священное,/ Да возсияет тобою верным/ Богоразумия нетленный свет.

От стражи утренния :

Не мню, глаголет Златоустый,/ Иереем многим спасенным быти./ О сем прилежно помышлял еси, Иоанне,/ Сего ради трепетом благоговейныя души,/ Призванию Господню повинуяся,/ Благодать пресвитерства восприемлеши,/ С неюже и благаго икономства дар,/ В немже является таинственно/ Богоразумия нетленный свет.

Яко у Господа милость:

Сияя достоинством души/ Витийством Духа изрядствуя/ Всеусердно семя слова Божественнаго/ Сеял еси в землю юных сердец/ О Иоанне мудрый сеятелю/ Паче же пастырю богопрославленный/ Иже первее в души восприял еси/ Послежде же умножил еси, расточая щедростию,/ Богоразумия нетленный свет.

Хвалите Господа вси языцы:

Внимая себе и стаду,/ В немже Бог постави тя пастыря,/ Отзывался еси сердцем чутким/ На боли без меры страждущих,/ Яже в сицевое время лютое без меры умножишася,/ И тако душу твою, Иоанне, уготовал еси/ Ко искушению лютейшему темницею,/ В нейже возсия терпеливодушию твоему/ Богоразумия нетленный свет.

Яко утвердися:

Слову Божию и деяниим любве/ Не бывает заключения,-/ Тако помышлял еси Иоанне:/ Аще бо и проповедь молчит,/ И доброделанию во узах места не обретается,/ Обаче усугубляются молитвы,/ И в души смирившейся христоподражательне/ Слышим есть благодати глас, яко хлада тонка,/ Еже есть богоразумия нетленный свет.

Слава, глас и подобен тойже:

Бог приобщися ми и аз по силе Ему,-/ Взывал еси трепетом Иоанне,/ Бог пострада за мя, и аз за Него стражду,/ Бог из мертвых возста, да и аз воскресну/ К некончаемей жизни в Дусе Святе./ Но Родивыйся мене ради и Умерый,-/ Воскресение даруй духу моему,/ Да во веки наслажуся/ Светом нетленным богоразумия.

И ныне: Праздника

 

Стихиры на литии

Слава, гл.3

Молитвами отеческими, о Иоанне,/ Чада твоя ограждаются,/ Храмы, идеже память чтится твоя,/ В новем благолепии возстают,/ Се бо евангельски светлейше/ Яко солнце во Царствии Отца Возсиял еси, святе, в просвещение наше.//

И ныне глас тойже :

Исполняему обетованию/ Лицезрит Симеон Славу Израиля/ С миром старец от уз разрешается/ Се сияет ему среде смертныя тьмы/ Во откровение языков Свет.//

  Стихиры на стиховне,
гл.2, подобен:*Доме Евфрафов*:

Земле Пензенская,/ Святовозрастившая/ Луг духовный умный –/ Спелым украшайся класом/ Иоанном хлебоименным//

Праведник яко финикс:

Храме академический/ Благочестия училище новое,/ Подвизай к молитве юныя,-/ Дерзновением учительным/ Иоанна сладковещаннаго.//

Насаждени в дому:

Соборе новомученик / Облак Истины свидетелей/ Благодать с Небес пробави/ Сопечальника поющим/ Иоанна златословеснаго//

Слава:

Бутово - врата небесныя -/ Страшнодивновеликия -/ Кровию праведничею священныя,/ Величайтеся подвигом/ Иоанна священнострадальнаго//

И ныне: Празднику

 Тропарь, глас 4

 Нивы церковныя благодатный клас/ Плод сторичный яве приносит/ Воспитуя глаголом духовным верныя/ Укрепляет надеждею небесных/ Манною богомыслия насыщает/ Тихону Святейшему соработник мудрый/ Вся претерпевает злострадания/ Сладкословесный свидетель Истины Иоанн// Молитвенник о душах наших/

Стихира по Евангелии, гл.6

 Святым, иже суть на Руси святей,/ Новомучеником преславным,/ Удиви Господь хотение Свое,/ Еже Церковь Русскую возродити/ Дерзновенным сих ходатайством,/ Сего ради о уделе своем умоляющу/ Иоанну пречудному возопиим:/ Радуйся, новый священномучениче

 

Канон
Празднику на 3 и сей святому, гл.4,
егоже краегранесие:
Воздохни о нас дерзновенне отче Иоанне
Песнь 1

Ирмос: Моря чермную пучину невлажными стопами древний пешешествовав Израиль крестообразныма Моисеовыма рукама Амаликову силу в пустыни победил есть.

Святый священномучениче Иоанне, моли Бога о нас:

Воспети новаго Иоанна златые уста, вкупе и житие со страданием, Слове Божий, сподоби, обычною Ти щедростию восполнив скудость мою

Святый священномучениче Иоанне, моли Бога о нас:

От корене благочестива прозябает благодати тезоименная отрасль, исполнь дивных даров, трудами сим умножаемым.

Слава: Зело искусен паки и терпелив являешися во учении , Иоанне, в немже светел ум паки и сердце чуткое притязаеши от юности, мудрее.

И ныне: Дщи фараонова пророка и вожда воспитует, от воды взятаго, Дева же Мариам ныне в Церковь вносит рукою того воды Разделившаго.

Песнь 3

Ирмос: Лук сильных изнеможе и немощствующии препоясашася силою сего ради утвердися в Господе сердце мое.

Святый священномучениче Иоанне, моли Бога о нас:

О теплоте веры сердечныя ревнует словом и житием Иоанн-ученик, яко и соученику того Фаддею чудному, в слове и подвизе изрядному, зело дивитися.

Святый священномучениче Иоанне, моли Бога о нас:

Христос сотвори прегрешения наша мучением совести Своей, - в дерзновении свидетельствуеши, Иоанне, добрым пастырством сему образу подобяся.

Слава: Немощь нашу восприемлет приискренне приобщивыйся нам, - с Павлом воззовеши о Христе, да и в твоей немощи, яко новоизбранна благодати сосуда, сила совершится Христова.

И ныне: И неслышен хвалы глас неплодныя древле Анны Богу слышим и удобоответен есть, и иныя Анны Прозябение Чудный Грозд воздает ныне Насадителю Твари.

Седален, гл.6

Смертное осуждение имея в себе апостольски, Иоанне, убиения лютаго не убоялся еси, всю надежду полагая во Христе, мертвыя возставляющем.
Слава и ныне: Праздника

Песнь 4

Ирмос: Вознесена Тя видящи Церковь на Кресте - Солнце праведное - ста в чине своем, достойно взывающе : слава силе Твоей, Господи.

Святый священномучениче Иоанне, моли Бога о нас:

О словес силы, о глубины неизглаголанныя, о чувства презящна Божиих таин, - како ти воспоем, о Иоанне! Обаче дерзаем твоими молитвами.

Святый священномучениче Иоанне, моли Бога о нас:

Не судит Богочеловек Христос в немощней потребе человека – зриши в сем, Иоанне премудре, снисхождение Того и ко внешней культуре, аще и к премирным немощна та есть.

Святый священномучениче Иоанне, моли Бога о нас:

Аггелу подобяся падшему, человекобожеское мнит, яко Богочеловеческому противодостойное – духом зриши сие, Иоанне, о веце лукавем нынешнем.

Слава: Святит Христос и о хлебе насущнем заботу,- проницаеши, Иоанне, глубины евангельския, - паки и служение приемлет Марфино, аще токмо не небрежет и та о Марииней душевней жажде.

И ныне: Дщи Фануилева радостотворит люди , присно с ней радости вине - Богородице - вопиющей: слава силе Твоей, Господи.

Песнь 5

Ирмос: Ты, Господи мой, Свет в мир пришел еси, Свет святый, обращая из мрачна неведения верою воспевающия Тя.

Святый священномучениче Иоанне, моли Бога о нас:

Еже сердцем чистым стати мыслию на человечестве Христове, - восторгом, Иоанне, восклицаеши – невозможно не зрети и Божество Иисуса-Господа.

Святый священномучениче Иоанне, моли Бога о нас:

Риторов новых обличаеши богоборное, яко не ведая, сами возвещают премудрости и любви Иисусовей недосязаемым быти человеками, яве сущим Божественным.

Слава: Заповедь даде Спас о любви новую, небрегущим нам, увы, о той сладчайшей, - стенеши, Иоанне, из глубины души – сего ради паки страждет Христос среде мрака века сего, просвещеннем лжеименуеме.

И ныне: Неведения Исаиина разрешается мрак Боговидением, и мы , Богомати, беззаконий наших свобождаемся причащением Сына Твоего пренебесных Таин.

Песнь 6

Ирмос: Пожру Ти со гласом хваления, Господи, - Церковь вопиет Ти, от бесовския крове очищшися ради милости от ребр Твоих истекшею кровию.

Святый священномучениче Иоанне, моли Бога о нас:

О Единем Спасе уязвлени есмы забвением, - сокрушением сердечным вопиеши, - обаче да не соуязвимся унынием, се бо Той Всемилостивый не забыл есть нас.

Святый священномучениче Иоанне, моли Бога о нас:

Восплачите, людие, восплачите над бездыханным нас ради Христом, - сице взывал еси, новый Иоанне, - путие ваша исправити потщитеся , се бо в тихом храма пристанищи всех приемлет Создатель всех.

Слава: Едина бе душа во ученицех апостольских, любовию еже во Христе связуемым, - слезиши, Иоанне, о древнем и видимем – и сие нам обличение и образ есть, суетою соугнетаемым.

И ныне: Нетленный Един носим Неискусобрачней познавается старцем Младенец-Бог, да всего от тли спасет одряхлевшего грехми человека.

Кондак, гл.4

Семя Божия звания восприим/ Доброю землею твоего сердца,/ Умножал еси веры сеяние, Иоанне мудре,/ Мольбами же слезными ниву Церкве орошая,/ Жатву ангелов многоусугубил еси,/ Иже классы восприяша праведных душ,/ Возделанных тобою, священнострадальче.

Икос

Яко истинный рачитель учения, паче же воспитания делатель искуснейший явился еси, Иоанне мудре, сего ради слово твое и поныне действенно и удобопостижно есть, се бо умы озаряет верных, паче же совесть богобоязненных уязвляет, просвещаемых тобою, священнострадальче

Песнь 7

Ирмос: В пещи авраамстии отроцы персидстей любовию благочестия паче, нежели пламенем опаляеми взываху: благословен еси в храме славы Твоея, Господи.

Святый священномучениче Иоанне, моли Бога о нас:

Не нерадивый о даре слова, с возложением руку священничества восприятом, ныне ревнует Иоанн о большем, пути превосходнейшу исповедания тому открывающуся.

Святый священномучениче Иоанне, моли Бога о нас:

Еже к людем любви сострадательней агрономы наставивый, ныне, отвсюду изган, всякой души христианстей состраждуя, земными небесная обретает.

Слава: О всех пекийся прилежне словом и любовию деятельней, ныне вся оставляет житейская нуждею Иоанн, да уготовится трисвятую песнь во веки воспеть Животворящей Троице.

И ныне: Тартара не страшится Симеон, не убоятся и новомученицы лютости богоборцев, благословя, Пресвятая, Сына Твоего в храме славы божественныя.

Песнь 8

Ирмос: На Кресте плотию носим пригвожденнаго и показавшаго нам оружие во спасение, отроцы превозносите Христа, Бога нашего, во веки.

Святый священномучениче Иоанне, моли Бога о нас:

Человечество на земли воспевый Спаса Христа, ныне тщится исповеданием Божественное Того на небесех возславити.

Святый священномучениче Иоанне, моли Бога о нас:

Еже жити Христос ми бысть, и еже умрети яве приобретение, аще дух уготовлю ко свидетельству конечному о Том – Жизни истинней.

Благословим: Истязания наста час мужа духовна, ни от когоже истязуемем, токмо от Христа-Судии, нас ради Истязаннем.

И ныне: Оружие и Тебе, Мати Чистая, душу пройде, егда зрела еси страдания новых мученик, во веки Сына Твоего и Тя славящия.

Песнь 9

Ирмос: Сотвори державу мышцею Своею, низложи бо сильныя со престол и вознесе смиренныя Бог Израилев. В нихже посети нас Восток с высоты и направил ны есть на путь мира.

Святый священномучениче Иоанне, моли Бога о нас:

Ангелом труд плачевный содеваемое в Бутове безчеловечие о тебе, Иоанне славне, и о сострадальцех твоих.

Святый священномучениче Иоанне, моли Бога о нас:

Немотствуют сладкословеснаго Иоанна уста, исполнену того духу смирения, исполняему слову и житию, яже во Христе.

Слава: Ныне рабы Твоя, Владыко, с миром отпущаеши, - вопиют Иоанн, Николай, вкупе и инии священномученицы, устреляеми безчеловечными, ангелы же на небесех сретаемии

И ныне: Егда славнии новомученицы воздохнут о нас Богородице, уповаем Тою спасение улучити и возопити Благословенней: Яже о всех благая Мати - слава Тебе.

 Светилен:

Се Иоанн светильник ясен светит - се ко Христу стезя нам расширяется.

Слава и ныне: Праздника

Стихиры на хвалитех, глас 5-й, подобен *Радуйся*:

Хвалите Его на силах Его:

Радуйся Иоанне пребогате,/ Богоданныя таланты умноживый/ Труды премногими неусыпными,/ Заповедей хранением тщательным,/ Паки в лишениих долготерпением,/ Ныне же воздаянием наслаждаешися:/ Мерою Божиею преутрясенною,/ Прославляя на лоне праведничи/ Троицу Единосущную и Нераздельную.//

Хвалите Его во гласе трубне:

Радуйся Иоанном святым подобниче:/ Крестителю – Божественною ревностию,/ Зрением таин премирных – Богослову,/ Златоустому же дерзновением,/ Ясностию слова – Лествичнику,/ Дамаскину – витийством изящнейшим,/ Святителю Александрийску – щедростию,/ Пастырю же Кронштадтску – изобилием даров/ Троицы Единосущшыя и Нераздельныя//

Хвалите Его в тимпане и лице:

Радуйся новым Российским мучеником сопричастниче:/ Первому в тех Иоанну духом храбростным,/ Восторгоименному же златословесным даром,/ В вере церковней стоянию – Иллариону,/ Фаддею же славному – немощных утешением,/ Сонесением креста пастырска – Святейшему Тихону,/ Истины исповеданием – Петру, того преемнику,/ Священному же Серафиму – сомученичеством в Бутове,/ Темже молитеся вси о нас Единосущней Троице.//

Хвалите Его в кимвалех доброгласных:

Радуйся Иоанне прехвальне,/ Чудный жития образ на земли оставивый,/ О часе конца помышляяй тщательно,/ Имже подвиг твой запечатлевый/ Славною кончиною мученика,/ Да в вожделеннем свете жития вечнаго/ Воспоеши вся животворящую/ Троицу Единосущную и Нераздельную./

Слава, глас 6:

Сиры не остави ны, отче,/ Прииди стани с нами,/ Настави милостиве,/ Како всем житием пети Христа/ Паки и твой любви к Нему подвиг.

На Литургии

Прокимен, гл.4: Тебе ради, Господи, умерщвляеми есмы весь день. Стих: Вменихомся, якоже овцы заколения.

Апостол к Римляном, зачало 99

Алиллуиа: Воззваша праведнии, и Господь услыша их Стих: Многи скорби праведным, и от всех их избавит я Господь

Евангелие от Луки, зачало 106

Просмотров: 611