Служба сщмч. Владимиру Медведюку
Память 3 декабря
По предначинательном псалме
Блажен муж: 1-й антифон.
На Господи воззвах:
стихиры предпразднства 3 и святому 5, глас 2.
Подобен: Егда от Древа:
Егда Владимире яснейше / путь ко Господу управил еси, / тогда возрастившее тя отечество оставль, / промыслу Всеблагаго Бога повинуяся, / славнаго града Москвы достиг, / идеже и приял еси священный сан, / да послужиши Христу Возлюбленному, / Иже есть Свет и Путь // и Жизнь истинная.
Егда попущением Божиим / восхитиша власть на Руси зверонравнии, / тогда, о Владимире доблественне, / дерзновенно восприял еси пресвитерство, / еже в сицевыя окаянныя дни / мученичеству равнодостойно есть, / аще пастырь следует Христу до конца, / присносущну Свету и Пути // и Жизни истинней.
Егда Митрофана священный удел / обрел есть в тебе, о Владимире, / новаго светоча добродетели, / слава того просия окрест / тебе ради воистину солнца, / уясняюща людем стези духовныя, / еще же согревающа страждущия: / сице бо учит Свет миру Христос, // Слово Отчее и Жизнь истинная.
Егда, о Владимире мужественне, / испытание новое от Господа достиже тя, / яко и храму заключену быти / и тебе неправедно осуждену на работы горькия, / тогда среде злостраданий лютых / просия долготерпением вера твоя: / тако бо прославити имя Отчее / благоволи в тебе Христос, // Свет и Путь и Жизнь истинная.
Егда тебе, Владимире смиреннейше,/ искушену скорбьми по всяческим,/ вселитися в тишине Язвища-села, / и тогда ясный свет твоея души / не возможе утаитися отнюд, / мужающимся верным в сиянии твоем / и безсильно ярящимся служителем тьмы, / не могущим коснутися в тебе глубины духа, // еже во Христе жизни истинней.
Слава, глас и подобен тойже:
Любы слава есть пастыря, / слава мученик — страдание; / слава твоя, Владимире, сугуба есть — / пастыря добра, душу за овцы положивша, / пострадавша же до крове за Христа. / Сего ради венчает тя Царь славы Господь, / сорадуется же полк новомученик, / и мы земнии прославляем тя, // молитвенника о душах наших.
И ныне, предпразднства.
Вход. Прокимен дне и чтения 3.
Обратися от небесе, Господи, и виждь от дому святаго Твоего и славы Твоея: / где есть ревность Твоя и крепость Твоя? / Где есть множество милости Твоея и щедрот Твоих, яко терпел еси нам, Господи? / Ты бо еси Отец наш, яко Авраам не уведе нас, и Израиль не позна нас, / но Ты, Господи, Отец наш, избави ны, яко изначала Имя Твое на нас есть. / Почто уклонил еси нас, Господи, заблудити от пути Твоего? / Ожесточил еси сердца наша, еже не боятися Тебе? / Обратися раб Твоих
ради, племен ради наследия Твоего. / Да помале наследствим гору святую Твою. / Противницы наши попраша святыню Твою. Быхом яко от начала, егда не владел еси нами, ниже назвася Имя Твое на нас. / Аще отверзеши небо, трепет приимут от Тебе горы и растаются, яко воск от лица огня тает. / И попалит огнь супостаты Твоя, и явлено будет Имя Твое противным Твоим. / От лица Твоего языцы возмятутся. Егда сотвориши славная, трепет приимут от Тебе горы. / От века не слышахом, ниже очи наши видеша Бога, разве Тебе, и дела Твоя истинна, и сотвориши терпящим Тя милость. / Срящет бо милость творящия правду, и пути Твои помянут. / И ныне, Господи, Отец наш Ты еси, мы же брение; и Ты Создатель наш, и дела рук Твоих вси мы. / Не прогневайся на ны, Господи, зело, и да не помянеши во время грехов наших; / и ныне призри, Господи, яко людие Твои вси мы.
Премудрости Соломони чтение:
Праведник аще постигнет скончатися, в покои будет. / Осудит же праведник умираяй живущия нечестивыя; / узрят бо кончину праведнаго и не уразумеют, что усоветова о нем, и во что утверди его Господь: / приидут бо в помышление согрешений своих ужасни, и обличит их противу беззакония их. / Тогда станет в дерзновении мнозе праведник, пред лицем оскорбивших его и отметающих труды его. / Видевше же его смятутся страхом многим, и ужаснутся о преславном спасении его. / И рекут в себе, кающеся: / сей бе, егоже имехом некогда в посмех и в притчу поношения. / Безумнии, житие его вменихом неистово, и кончину его безчестну. / Како вменися в сынех Божиих, и во святых жребий его есть? / убо заблудихом от пути истиннаго, и правды свет не облиста нам, и солнце не возсия нам. / Беззаконных исполнихомся стезь и погибели, и ходихом стези непроходны, / пути же Господня не разумехом.
Премудрости Соломони чтение:
Похваляему праведнику, возвеселятся людие: / безсмертие бо есть память его, / яко от Господа познавается и от человек, / и угодна Господеви душа его. / Возлюбите убо, о мужие, мудрость и поживете: / восхощите ея и наказани будете. / Начало бо ея любы и соблюдение закона. / Почтите премудрость, да во веки царствуете. / Возвещу вам и не скрыю от вас таин Божиих, / яко Той мудрости Наставник есть, и мудрых Исправитель, / и всякому смыслу и делу Хитрец. / И всем смыслом научит мудрость, / есть бо в ней Дух Разумен и Свят, / и сияние Света присносущнаго, и образ благости Божия. / Тая други Божия и пророки устрояет, / благолепнейши же есть солнца и паче всякаго сотворения звезд, / свету сосуждаема, обретается первейши. / Тая угождающих ей от болезни избави / и настави на стези правыя. / Даде им разум имети свят, / и сохрани я от ловящих, и подвиг крепок подаде им. / Да разумеют вси, яко сильнейши всего есть благочестие, / и никогдаже преможет злоба мудрости, / ниже прейдет злыя обличающи суд. / Рекоша же в себе, помысливше неправедно: / насильствуем праведному, и не пощадим преподобства его, / ни усрамимся седин старости многолетны. / Будет бо нам крепость закон / и уловим праведнаго, / яко неугоден нам есть, / и противится делом нашим, и поносит нам отпадение закона, / и обличает нам согрешения наказания нашего. / Возвещает нам разум имети Божий, / и отрока Господня себе именует. / Бысть нам на обличение помышлений наших и тяжек нам есть, / и видим, яко неподобно иным житие его, и изменены стези его. / В поругание вменихомся ему, / и удаляется от путей наших, яко от нечистот, / и блажит последняя праведных. / Увидим убо, аще словеса его истинна суть, / искусим, яже сбываются ему. / Руганием и мукою истяжем его, / да разумеем кротость его и искусим беззлобство его, / смертию безобразною осудим его, / будет бо посещение от словес его. / Сия помыслиша и прельстишася, ослепи бо я злоба их, / и не разумеша таин Божиих и не разсудиша, / яко Ты еси Бог Един, живота имеяй и смерти власть, / и спасаяй во время скорби, и избавляяй от всякаго зла. / Щедр и Милостив, и даяй преподобным Своим Благодать, / и Своею мышцею гордым противляяйся.
Болезнуя сердцем пастырским / об овцех, горце разсеянных, / давидски стеня, изгнанниче, / ко Спасу зовеши, Владимире: / внидоша воды слезныя до души моея, / да не постыдятся о мне терпящии Тебе, Господи, // ниже да посрамятся ищущии Тебе.
Поношения поносящих, Боже, Тебе / нападоша на мя, раба Твоего, / воздыхаеши терпеливейше, / аз же, Спасе, к Тебе молитвою: / не забуди, услыши мя в милости, // се бо есть время благоволения Твоего.
Се течение совершается, / возглашается суд убийственен, / о Владимире, агнче и пастырю, / к заколению ныне тщишися; / пред миром безгласен являяся, / духу дышащу псалмопением: / услыши мя, Господи, яко блага милость Твоя, / поношение претерпех Тебе ради, Святый, / вонми души моей и избави ю, // спасение Твое, Боже, да приимет мя.
Се, кончаему на Руси лету лютому, / плачем вдов и сирот преисполнену, / пятию сиротами и вдовицею / неутешней земли приложилося, / убиену ти, святе, в Бутове; / в небе ж Русском звезда возсияла есть. / Нам же, светом молитв твоих просвещаемым, / вложи, отче, в уста покаяния песнь: / Свят, Свят, Свят еси, Боже Праведне, // Богородицею помилуй нас.
Слава, глас 2, подобен: Егда от древа: Сияя достоинством души, / восходя к Свету Господу, / уяснил еси евангельский путь, / утеснение всякое претерпев, / горних достигл еси высот, / о Владимире солнце ясное, / яко свет вторый Свету первому предстоя, / разжени души моея хладную тьму // лучею теплою молитв твоих.
И ныне, глас и подобен тойже: Сиянием пренебесной чистоты, / о Дево Пренепорочная, / небеса воистину облистала еси, / славо богозданныя земли, о Мариам, // Богородице и Мати Света.
На стиховне стихиры, глас 2.
Подобен: Доме Евфрафов:
Земле Холмская, / саде Православия, / крин святый прозябшая — / дивнаго Владимира, // честию процветай нетленною.
Стих: Праведник яко финикс процветет, / яко кедр, иже в Ливане, умножится.
Граде первопрестольне, / велий сонм явивый / ясных новомученик, / сограждан Владимира, // славою сияй Божественне.
Стих: Насаждени в дому Господни, / во дворех Бога нашего процветут.
Дебрь Волоколамская, / в язвищи сокрывшая / от волков лютых агнца / кроткаго Владимира, // подвигом того красуйся.
Слава, глас и подобен тойже: Митрофана чуднаго / светлый сонаследниче, / теплый наш печальниче, / умоли, Владимире, // Господа о любящих тя.
Просвещен любовию Христовою, / согревал еси тою верных сердца, / от нихже солнцем ясным наречен, / к зениту славы, яже от Единыя Троицы, восходя, / закатом багряным мученичества украсився, / во Царствии Небеснем возсиял еси cветлейше, / о Владимире священнострадальче, / моли Солнца правды Христа // просветити и спасти души наша.
На Бог Господь:
тропарь святаго дважды.
Слава, и ныне, предпразднства.
По 1-м стихословии седален, глас 2: Несть души моей, отче, пластыря приложити, / ниже елеа ранам ея, ниже обязания обрести, / обаче исцелитися уповаю // твоими, Владимире, и новомученик молитвами.
Слава и ныне, предпразднства.
По 2-м стихословии седален, глас 2: Не сотворшему милости суд без милости есть, / и что отвещаю на Суде Спаса Всемилостиваго, / аще не ты, честне Владимире, // умилостивиши Того о мне?
Слава и ныне, предпразднства.
Погибающим юродство крест есть, / сила Божия — новомучеником / и тебе, стратиже Владимире // христолюбиваго сих воинства.
Слава и ныне: Погибшим взыскание вемы Тя, / Милосердия Мати, / сего ради со отцем нашим Владимиром сыновне зовем Ти: // радуйся Дево, христиан похвало!
Прокимен на утрени, глас 4: Святым, иже суть на земли Его, / удиви Господь вся хотения Своя в них.
Стих: Предзрех Господа предо мною выну, / яко одесную мене есть, да не подвижуся.
Евангелие от Матфея, зачало 36.
По 50-м псалме стихира, глас 6: Святым иже суть на Руси Святей, / новомучеником преславным / удиви Господь хотение Свое, / еже Церковь Русскую возродити / дерзновенным сих ходатайством; / сего ради о уделех своих умоляющу / Владимиру пречудному возопиим: // радуйся, новый священномучениче!
Канон, глас 4,
егоже краегранесие сице: О любовию тя поющих моли, отче Владимире
Песнь 1
Ирмос: Воду прошед яко сушу / и египетскаго зла избежав, / израильтянин вопияше: // Избавителю и Богу нашему поим.
Огради моя помышления и чувствия охрани, о Христе Царю, да Владимира дерзну воспети, вернаго служителя Твоего.
Луков-град, сияй светлейше, возшедшу в тебе Владимиру ясну, светочу и путевождю нашему.
Юношеския страсти отверг, начало учения полагаеши на духовней стезе, да люди Божия приведеши к земли обетованней, вечней.
Богородичен: Богородицею храними, возопиим благодарственно из глубины души: радуйся, Дево Чистая и Мати христиан.
Песнь 3
Ирмос: Ты еси утверждение / притекающих к Тебе, Господи, / Ты еси свет омраченных, // и поет Тя дух мой.
Отверз юная и честная уста, слово Божие возвещает Владимир в Радоме, яко благоговейный чтец Церкве великия.
Верою приемлеши Божие звание, страннолюбиве, Авраама произволению подражаяй, оставль землю отечества, да жертвы чистыя принесеши Христу.
Ирина мученица радовашеся, видящи в храме своем чина Стефанова украшение, мужа мудра и смыслена, Владимира диакона, мученика произволением.
Богородичен: Юницу, во едино нас на хвалу собравшую, приидите, вернии, воспоим, стадо суще Сына Ея, Юнца и Пастыря.
Седален, глас 4 :
Зрелый клас села церковнаго / явился еси, Владимире, / сего ради, умерщвлением лютым посечен, / в небесней житнице // яве обретаешися.
И ныне, предпразднства.
Песнь 4
Ирмос: Услышах, Господи, / смотрения Твоего таинство, / разумех дела Твоя // и прославих Твое Божество.
Тихону Святейшему возглашающу — Чадца! Зову вы с собою на страдания и смерть за Христа — трепетом внемлеши и к священства благому игу дерзаеши мужественне.
Языков апостол вопиет: наставников вере подражайте; темже течет Владимир иерей по духовнем отце своем, паче же по Иисусе Господе.
Прехождение твое во удел Митрофаниев радостотворит люди, умножая во граде свидетельство доброе о теплом пастыре и молитвеннике.
Богородичен: Очисти мой ум, Спасе Христе, Рождшия Тя молитвами, и сердце умягчи, Владыко, да песнословлю во истине Твое Божество.
Песнь 5
Ирмос: Просвети нас повелении Твоими, Господи, / и мышцею Твоею высокою // Твой мир подаждь нам, Человеколюбче.
Юже взыскал еси Премудрость Божию, Юже возжелел еси Любовь истинную, Та и светло осеняет тя, Иже над всеми есть Иисус Человеколюбец.
Щит, по апостолу, вера есть, не посрамляет и надежда, любы же воистину совершенства соуз, темже, мудре Владимире, выну в сих разумевал, в сих и пребывал еси.
Истинно зря в тебе добродетели краеугольныя, от конец Москвы собирается паства твоя, да любовию утвердиши ю на недвижимем веры камени.
Богородичен: Христе, зриши помрачение наше, зриши и душ смятение, Рождшею Тя умолен буди, не лиши нас мира Твоего, Человеколюбче.
Песнь 6
Ирмос: Молитву пролию ко Господу / и Тому возвещу печали моя, / яко зол душа моя исполнися / и живот мой аду приближися, / и молюся, яко Иона: // от тли, Боже, возведи мя.
Молитвою еже о пастве сердце ко Господу изливал еси, се бо молитися истинно яко кровь пролияти есть.
О распинающих Господь и Учитель молится, тако и Владимир, Того ученик, словом и делом творит и учит, егда судищу предается безбожных, и запустевает до времене Митрофана храм.
Лютой дерзости раскольничей мужественне противостав иногда, паки дерзаеши о Господе, на горькия работы осужден безчеловечными и лютыми.
Богородичен: Ионе подражающе, вопием из глубины зол, страстьми конечне обуреваемии: не презри, Спасе, се бо Мати Твоя умоляет за ны.
Заступати немощныя, малодушныя утешати / научився от Алексия праведнаго, / паству многую собрал еси в долготерпении, / от неяже безбожными люте разлучен, / крестный путь облобызал еси; / ныне со Христом присно радуешися, / непрестанно, Владимире, Того моля // о душах наших.
Икос:
Егда прииде на землю Русскую година лютая, / о Владимире доблественне, / крепчае подвиглся еси о благочестии, / таже прошед сугубое поприще страдания и смерти, / Христа, на тыя призвавшаго тя, / дерзновенно исповедал еси/ яко Учителя и Подвигоположника,/ темже непрестанно Того яко Спаса и Судию // моли о душах наших.
Песнь 7
Ирмос: От Иудеи дошедше отроцы / в Вавилоне иногда, / верою Троическою пламень пещный попраша, поюще: // отцев Боже, благословен еси.
Озаряется север сиянием подвигов исповедник святых, спросиявшу им Владимиру досточудну, сострадальцу онех и печальнику нашему.
Треми леты мучительства, яко тридесятьми удрученный, возвращаешися во своя, зело юн сердцем незлобивым, паки и духом смиренномудр.
Что Тебе принесу, Христе, яко пострадал еси мене ради? — сице болезнуя помышлял еси, яве сердцу отвещавающу: убо паки спостражду Ти, да с Тобою cпрославлюся.
Богородичен: Егоже возлюбила еси Отца, Егоже родила еси Сына, и Духа, пречудно сошедша на Тя, моли, Чистая, о чисте вопиющих: Боже Пречисте, благословен еси.
Песнь 8
Ирмос: Царя Небеснаго, / Егоже поют вои ангельстии, // хвалите и превозносите во вся веки.
В Язвищи призываешися послужити нас ради Изъязвлену и не имущему где подклонити главу, токмо в сердце смиреннем, любовию Того уязвленнем.
Лукавое судище злосоветия исполнено, легеоном ангелов готовым предстати, обаче замедляющим, егда волею следует раб крестным путем Владыки.
Ад Бутова в рай претворися Владимиру и собратиям его, возсия и нам спасения надежда, се бо воистину кровь мучеников семя Церкве есть.
Богородичен: Дева соскорбит, зря страдания новомученик, паки же сорадуется, яко Мати, сомолитвенники о нас обретшая.
Песнь 9
Ирмос: Воистину Богородицу Тя исповедуем, / спасении Тобою, Дево Чистая, // с безплотными лики Тя величающе.
Искушен скорбьми по всяческим, яко в дусе избран Алексиев сын, мученичества венцем украшаешися, в сем стоянии до конца укрепи и нас, о Владимире терпеливейший.
Митрофана славнаго соработниче, труд велик души употребив, воздержания мерность чисте храня, раем сладости обогатился еси; от плодов того напитай и нас, о Владимире щедродателю.
Иосифу милосердому подражая, отечество того паки просветил еси, яко кроткий о Христе изгнанник, яве Волоцкия земли звездо новая, осияй и нас, о Владимире.
Рая вышняго удостоился еси, яко крепкий о Христе страдалец, не отступи убо, Того моля о нас, дондеже и на небо возведеши тя воспевших любовию.
Богородичен: Егда славнии новомученицы воздохнут о нас Богородице, уповаем Тою спасение улучити и возопити Благословенней: Яже о всех Благая Мати, слава Тебе.
Светилен:
Солнце светлостию превозшедый, / святостию возсияв на небесех, / Света истиннаго лучу и нам ниспосли, / о Владимире ясне, // от Христа — Света миру и Правды Солнца.
На хвалитех стихиры 4, глас 8.
Подобен: О преславнаго чудесе:
Отче Владимире пребогате, / на земли Святаго Духа Божия стяжав, / яко благаго воистину сокровища, / Егоже дарми ныне на небесех преизобилуеши, / обнищавших нас не забуди, щедре, / да долгов греховных свободившеся, / покаяния плоды обогатимся / и милость улучим безмерную // Единаго Всемилостиваго.
Отче Владимире премудре, / положил еси жизнь на созидание / храма Божия в себе самем. / Людие от конец собирахуся к тебе / слово слушати любве духовныя, / таже и благословением твоим / потрудитися о Господе; / и нас удрученных тяготою греха // рабы Христовы истинныя сотвори.
Отче Владимире преблаженне, / дея заповедем Божиим учил еси, / первее во смирении утверждатися, / плачем о гресех приимати утешение, / кротостию землю новую наследуя, / еяже красоты не виде око, / и ухо земнородных не слыша, / и на сердце не взыде человеку, // яже уготова Бог любящим Его.
Отче Владимире преславне, / чтим тебе, чадолюбиваго отца, / житием верных яве наказующа / небоязненно тещи евангельским путем, / имже выну следуя Христу, / изгнанием же и смертию горькою искушен, / вселился еси в обители Отца Небеснаго, / идеже некончаемыя радости наслаждаешися, // юже Бог уготова тебе, возлюбившему Его.
Глас 3:
Стих: Воззваше праведнии, / и Господь услыша их.
Взяту голубю в стаю ангельскую, / вознесену к Вышнему духом в горняя, / сиротствуют пяточисленнии птенцы, / утесняеми всюду вранами, / но в лишении храними материю, / сею надеждею окриляются: / еже уютствовати во веки со отцем // под крилами Орла Небеснаго.
Слава, глас тойже:
Сострадательныя послушницы / о Христе сосвидетельствовати / с собою, Владимире, привлекл еси, / и нас, твой подвиг воспевших, / послушая сострадательне, / ко спасения тесным стезям // ясным образом твоим и молитвами привлецы.
И ныне, предпразднства.
На литургии.
блаженны на 8: Предпразднства 4 и святому, глас 8:
Стих: Блажени есте, егда поносят вам, и изженут, / и рекут всяк зол глагол на вы, лжуще Мене ради.
Лютой дерзости раскольничей/ мужественне противостав иногда, / паки дерзаеши о Господе, / на горькия работы осужден // безчеловечными и лютыми.
Стих: Радуйтеся и веселитеся, / яко мзда ваша многа на Небесех.
Озаряется север сиянием подвигов исповедник святых, / спросиявшу им Владимиру досточудну, / сострадальцу онех // и печальнику нашему.
Слава: Ад Бутова в рай претворися / Владимиру и собратиям его, / возсия и нам спасения надежда, / се бо воистину // кровь мучеников семя Церкве есть.
И ныне: Егда славнии новомученицы / воздохнут о нас Богородице, / уповаем Тою спасение улучити / и возопити Благословенней: // Яже о всех Благая Мати, слава Тебе.
Прокимен, глас 7:
Восхвалятся преподобнии во славе / и возрадуются на ложах своих.
Стих: Воспойте Господеви песнь нову, / хваление Его в церкви преподобных.
Апостол к Римляном, зачало 99.
Аллилуия, глас 4:
Воззваша праведнии, и Господь услыша их, / и от всех скорбей их избави их.
Стих: Многи скорби праведным, / и от всех их избавит я Господь.
Евангелие от Иоанна, зачало 52.
О предобре пастырю и славне мучениче Христов Владимире!
Вемы, яко ты в житии заступал еси обидимых, милосердовал еси о страждущих, всем требующим помощи обреташеся место в пространнем сердце твоем. Паче же чистою молитвою стяжал еси Духа Божия, Иже освятил и умножил есть всякую добродетель твою. Сего ради мы недостойнии надежду несумненную возложихом на твое заступление, милосердие и любовь. Се бо, грехом нашим умножившимся, скорбьми якоже тучами обложихомся, и несть заступающаго или помогающаго, яко и благодати Божией лишаеми есмы душевныя ради нечистоты. Услыши, отче, призывающих тя, не презри к тебе вопиющих, заступи прибегающих под твой молитвенный кров. И якоже трудами любве умножал еси паству твою, солнцем ясным тебе именовавшую, тако и ныне лучами молитв твоих разсей мрак греховный страстей наших и возгрей спасительное сеяние Христово на Руси Святей, да умножится плод благовестия церковнаго.
Умоли Господа, святе Владимире, да и мы, избежавше козней диавольских, во смирении духа мужественне тесный евангельский путь жития прешедше, мирныя христианския кончины сподобимся и тако достигнем блаженныя вечности на вожделеннем пире Царствия Божия, идеже вкупе с тобою и собратиями твоими, славными новомученики, во веки воспоем Бога, во Святей Троице славимаго Отца и Сына и Святаго Духа. Аминь.
Просмотров: 3684