Служба священномученику Иоанну Прудентову

Память 25 сентября

Великая вечерня

Стихиры на Господи, воззвах: Праздника - 3 и сия 5 - святому:

глас 8:

Приидите, о вернии, / отрасль вознесем благодатную / корене благоразумнаго именем и памятию: /Иоанна пастыря и мученика, /

велиих даров наследника, / благословяща вечне, // неизреченныя Спасовы благостыни благость /

Священство благоговением наследствуя со учительством, / един талант иному прилагаеши, / благоукрашая лика церковна согласие, /

паки щедростию души любвеобильныя, / паству, Иоанне, созываеши благословити // Спасовы неизреченныя благостыни благость.

Страннолюбие являя Авраамово, / притяжал еси ревность Илиину, / обличая маммоны рачителя, / и тако молитвами Кронштадтска светоча, / ограждаеши верныя от соблазна пиянства, / благословя со присными духом // неизреченныя Спасовы благостыни благость.

Кампан на рамена подъемлют / благочестивии соотчичи твои, / о дерзновенне Иоанне, / во еже вознести на высоту того, / да среде лихолетия лютаго / благовестит людем Божиим, / да благословят любовию // неизреченныя Спасовы благостыни благость.

Истязанием лукавым, судом неправедным, / до сибирских непроходных блат / изгоняют тя безбожнии, / идеже, мразом лютым томим, / о присных оставленных и пастве печалуеши, / благоявляя, Иоанне чудне, образ / неизреченныя Спасовы благостыни благости.

Слава, глас тойже:

От крайния нищеты, Иоанне, / отвсюду утесняем безбожными, / притяжав некрадомо богатство воздержания, / на поприще страдания дерзаеши сугубое, / да, устреляем лютостию миродержца, / во веки, святче, насладишися // неизреченныя Спасовы благостыни благости.

И ныне: Праздника или сей, гл.6:

Вертепе, благоукрасися…

Вход, прокимен дне и чтения 3:

Притчей чтение.

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку, и блажен человек, иже пути моя сохранит. Исходи бо мои – исходи живота, и уготовляется хотение от Господа. Сего ради молю вас и предлагаю мой глас сыновом человеческим: яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим и проста обретающим разум. Научу бо вас истине, да будет о Господе надежда ваша, и исполнитеся Духа.

Прему́дрости Соломо́ни чте́ние:

Пра́ведник а́ще пости́гнет сконча́тися, в поко́и бу́дет./ Осу́дит же пра́ведник умира́яй живу́щия нечести́выя;/ у́зрят бо кончи́ну пра́веднаго и не уразуме́ют, что усове́това о нем, и во что утверди́ его́ Госпо́дь:/ прии́дут бо в помышле́ние согреше́ний свои́х ужа́сни, и обличи́т их проти́ву беззако́ния их./ Тогда́ ста́нет в дерзнове́нии мно́зе пра́ведник, пред лице́м оскорби́вших его́ и отмета́ющих труды́ его́./ Ви́девше же его́ смяту́тся стра́хом мно́гим, и ужа́снутся о пресла́вном спасе́нии его́./ И реку́т в себе́, ка́ющеся:/ сей бе, его́же име́хом не́когда в посме́х и в при́тчу поноше́ния./ Безу́мнии, житие́ его́ вмени́хом неи́стово, и кончи́ну его́ безче́стну./ Ка́ко вмени́ся в сыне́х Бо́жиих, и во святы́х жре́бий его́ есть?/ у́бо заблуди́хом от пути́ и́стиннаго, и пра́вды свет не облиста́ нам, и со́лнце не возсия́ нам./ Беззако́нных испо́лнихомся стезь и поги́бели, и ходи́хом стези́ непрохо́дны,/ пути́ же Госпо́дня не разуме́хом.

Премудрости Соломони чтение.

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено. И в мале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их: и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему. Яко благодать и милость в преподобных Его, и посещение во избранных Его.

Стихиры на литии глас 7:

Болезнуя сердцем пастырским / об овцех, горце разсеянных, / давидски стеня, изгнанниче, / зовеши Христу, Иоанне: / внидоша воды слезныя до души моея, / да не постыдятся о мне терпящии Тя, Господи сил, // ниже да посрамятся ищущии Тебе.

Поношения поносящих, Боже, Тебе / нападоша на мя, раба Твоего, / - воздыхаеши терпеливейше - / аз же, Спасе, к Тебе молитвою: / не забуди, услыши мя в милости - // се бо ныне время благоволения Твоего.

Во своя возвращся, лишен всего, / тяготою безмерною обложен, / токмо Ти, Сердцеведче Господи, / поверяю тугу душевную: / о Зиждителю, паче Пища всех, / Сам восполни земных оскудение крайнее, // не лиши, Человеколюбче, и небесных.

Слава: Се течение совершается / возглашается суд убийственен: / Иоанне, о агнче и пастырю, / к заколению ныне тщишися, / пред миром безгласен являяся, / духу дышущу псалмопением: / услыши мя Господи, яко блага милость Твоя, / поношение претерпех Тебе ради, Святый, / вонми души моей и избави ю, / спасение Твое, Боже, да приимет мя.

И ныне: Разверзающуся на Руси лихолетию, / плачем вдов и сирот преисполнену, / семью сиротами и вдовицею/ неутешней земли приложися, / устрелену ти, святе, лютостию,- / в небе Русском звезда убо возсияла есть. / Нам же, светом молитв твоих просвещаемым, / вложи, отче, в уста покаяния песнь: / Свят, Свят, Свят еси, Боже Праведне, // Богородицею помилуй нас.

На стиховне стихиры, глас 3:

Иоанне, о светочу наш,/

Заблуждающим стези правыя укажи,/

Унывающим утешением просияй,//

Непроходных путей сохрани далече. /

Праведник яко финикс процветает:

Иоанне, о пастырю наш,/

От волков ны изхити мысленных,/

Среде терний соблазн овцы Господеви сохрани, //

На пажитех воспитуя духовных./

Насаждени в дому Господни:

Иоанне, о мучениче наш,/

Землю свята подвига твоего благослови,/

Люди в вере утверди Божия,//

Да последуют о Господе стопам твоим.

Слава, глас тойже:

Иоанне, о ходатаю наш, /

Недостойныя обрати ны к покаянию, /

Исправлением верныя усоверши, //

Безответныя на Суде муки избави вечныя.

И ныне: Праздника или сей, гл.6:

Безневестная Дево...

Тропарь, глас 1:

Пастырская свирель доброгласия твоего/ созывает словесныя овцы/ еже внимати житию твоему, славне:/ о благочестии ревностию подвигшуся,/ трегубое страданий поприще прошедшу со Христом,/ изгнание претерпевшу и крайнюю нищету,/ душу конечне за Господа положившу, о Иоанне,// сладчайше молитвенниче наш.

Утреня

По 1-й кафизме седален, глас 8:

Образ являя трудолюбия пастырска, Иоанне, / и доныне собираеши овцы // славити Христа Пастыреначальника.

Слава и ныне: Праздника или сей:

Заступлением не остави, укрепи на борющия ны, вся бо возможна Тебе суть, Мати-Дево.

По 2-м стихословии седален, глас 6:

По 2-й кафизме седален, глас 8:

Образ являя свидетельства мученическа, Иоанне,/ и доныне собираеши верныя// следовати по тебе ко Христу Подвигоположнику.

Слава и ныне: Праздника или сей:

Несть отчаяния верным, несть одоления от врагов, Божия Матере покров обретшим.

Величание священномученику:

По полиелее седален, глас 8:

Беды от сродник, беды во градех, /

Труды и бдения множицею, /

Апостольски, отче, подъял еси, /

Задняя забывая, в предняя простираяся,/

Никакоже земныя награды ища, //

Токмо духа блаженство сокровищствуя.

Слава, глас тойже:

Во изгнании и по возвращении во своя / Всюду гладствуя, в крайних лишениих / Апостольски, отче, подвизался еси,

Малодушныя утешая, страждущим соскорбя,

Се - венец пастырска, вкупе и мученическа пути

Похвалою от Господа печатлеема.

И ныне, глас тойже:

Явлением пречистых образов Твоих/

Апостольски, Дево Пречистая, обтекла еси/

Грады и страны христианския,/

Убо молитвами триех другов и мученик:/

Павла со Иоанном, паки славима ныне Иоанна,/

Велиих Дорков похвалы - //

Землю Палешскую и Шуйскую благослови, Всеблагая Одигитрие!

Прокимен, глас 4: Святым, иже суть на земли Его, удиви Господь вся хотения Своя в них:

Стих: Предзрех Господа предо мною выну, яко одесную мене есть, да не подвижуся:

Евангелие от Матфеа: зачало 36

Стихира по Евангелии, глас 6:

Святым иже суть на земли Его,/ новомучеником преславным,/ удиви Господь хотение Свое,/ еже Церковь Русскую паки прославити/ дерзновенным сих ходатайством,/ сего ради о уделе своем умоляющу,/ Иоанну священнодивному возопиим:// радуйся солнце земли сея благословенныя!

Канон Праздника и сей святому, глас 3-й, егоже краегранесие:

Иоанну священномученику похвалу пою

Песнь 1

Ирмос. Фараони колесницы глубиною покрыв Господи,/ море разверзл еси/ и спасл еси песньми поющия Тя, // люди Израильтеския.

Именем и житием благоразумне, / Иоанне о пастырю благий, / немощи презирая ми, в разум настави // к песнопению страдальческа ти подвига.

От рода священна прозяб, / яко велий дар являеши ся родителем в преселении, / тайнонося освящение дароименней земли // страдальческим ти, Иоанне, подвигом.

Слава:

Авраамия свята мощи / сродник твой из огня изъят, / да, егоже дерзновением вдохновен, Иоанне, / яко всесожжение Господеви вознесешися // страдальческим ти подвигом.

И ныне:

Непорочная, взыщи блудныя, / немощныя воздвигни, Неусыпающая, // о отчаянных умоли, о Нетленная.

Песнь 3

Ирмос: Утверждение и очищение / подаждь нам, Сыне Божий, // и спаси ны, яко Человеколюбец.

Научение духовное зрел сый разумом избираеши, Иоанне, / абие от таланта ти учительска разделяя юным, / от млада умножая возраста // данную от Бога благодать.

Уготовляеши си благословение, Иоанне, / от добра избирая рода супружницу: / сия, по пророку, венец ти мужеством бысть, // умножающи трудами Богом данную благодать.

Слава: Священство восприим яко от Господа звание, / паству отчу, Иоанне, наследуя,/ зрел сый духом яко иконом благий, являеши ся, // умножая трудами Богом данную благодать.

И ныне:

Веси скорбь нашу, Владычице, / веси немощь и озлобление, // не отрини, Чистая, рабы Твоя

Седален, гл:

Ничимже лишени быша/ Христовы друзи апостоли/ на путех проповеди евангельския,/ тако и раб Его Иоанн/ вся оставляет на земли/ дружбы ради Христовы вечныя.

Слава и ныне: Праздника или сей:

Немощным исцеление,/ подвизающихся крепость,/ всем скорбящим радость познахом Тя,// Дево Богородице

Песнь 4

Ирмос: Положил еси к нам твердую любовь, Господи,/ Единороднаго бо Твоего Сына за ны на смерть дал еси. / Темже Ти зовем благодаряще:// слава силе Твоей, Господи.

Яко некую свирель богогласную / лик церковный благоустрояеши, Иоанне отче: / се труды ти неусыпныя, / се же похвала поющему: // слава силе Твоей, Господи.

Щедростию украшен духа, / страннолюбие души являет соотчичам Иоанн, / аще и малым удовлен, разделяет последняя просящим, / несумненною взывая верою: // слава силе Твоей, Господи.

Слава:

Еже к присным духа строгостию обращен, / еже к немощным – терпением, / вся любовию покрывая, отче, / вся пети созываеши: // слава силе Твоей, Господи.

И ныне:

Не остави в болезнех, Целительнице, / возносящияся смири кротостию, / унывающия воздвигни, // вся любовию уврачуй ны, Владычице.

Песнь 5

Ирмос: Твой мир даждь нам, Сыне Божий, иного бо разве Тебе бога не вемы, в вышних со Отцем и Духом славимаго.

На духовную брань уготовляется Иоанн, / не смущается яко Давид супостата яростию, / о спасении овец вооружается пастырь молитвою: // се бо в немощи совершается сила Божия.

Оглушен маммоны служитель страстию, / не внемлет Писанию, / яко ни лихоимцы, ни пияницы не наследят Божия Царства: / люди поучается искусити продерзый, // - уповающу Иоанну на молитвы святых и силу Божию Слава:

Милость ниспосылает Господь, супостат посрамляется, / двум Иоаннам согласно молящимся: / Всероссийку убо пастырю/ с ним же и мученику произволением: // се – дерзновение святых и сила Божия.

И ныне:

Упование христианом, грешных Споручнице, / покаянием настави ны, // на правый путь, Одигитрие.

Песнь 6

Ирмос: Возведи от тли мя, Господи Боже мой, Иона вопияше,/ и аз вопию Ти: из глубины избави мя, Спасе, многих моих зол,/ и к свету Твоему, молюся, настави.

Чада церковная собираеши, Иоанне, / еже от своих им рамен на высоту кампан воздвигнути, / да беды упреждает и к молитве зовет, // паче же святыя да благовестит торжества.

Евангелия ради и Христа-Господа / свидетельство предлежит ти яко служителю Его: / се, лихолетию лютому зачинающуся, / паству утверждаеши, Иоанне, // еже чтити святая торжества.

Слава:

Не мимоидут тебе, о Божий пастырю, / злонеистовства окаянных дней: / се, безбожными истязуем, / духом явственне предстоиши, // яко раб Владыце-Христу.

И ныне:

Истязуемым исповедником / сопечалуеши яко Мати, / яко Раба Господня предстоиши о тех // Сыну и Богу Твоему: Владыце-Христу.

Кондак, глас 3:

Иоанне, благочестия о учителю,

Иоанне, о неленостне пастырю,

Иоанне, исповедниче неколебиме,

Мучениче, о Иоанне, доблественне,

Образ буди верным, святче,

Паки ходатаем теплым пред Господем.

Икос:

От юности, Иоанне святе,/ добрым вооружився подвигом,/ сокрушал еси терпением крайним/ враги видимыя с невидимыми,/ николиже постыдевся упования о Господе,/ да и по мученичестве славнем/ образ явишися верным// вкупе и ходатай теплый пред Господем

Песнь 7

Ирмос: Якоже древле благочестивыя три отроки оросил еси в пламени халдейстем, светлым Божества огнем и нас озари, благословен еси, взывающия, Боже отец наших.

Кротостию утвержден, по апостолу, / единение духа в союзе мира друголюбием обретаеши / со Иоанном Палешским и светозарным Павлом // яко сомученик тем произволением.

Убиенным другом, разоренным церквам, / сокрушен кампан, сокрушен и дух, / плача время наста Иоанну, / предуготования души ко исходу, // к суду Спасову - неумытну и милостиву.

Слава:

Приспе время, прииде час, - / возглашает тихостию Иоанн, / да первое о Тебе совершу поприще / изгнанием в весь безжизненную, // да терпения Ти, Господи, плод принесу.

И ныне:

О разлученных неволию умоли, Мати Божия, / сиры не остави тех / – мирне вопиет Иоанн, // с нимже безчисленнии исповедницы.

Песнь 8

Ирмос: Благодетеля и Бога и Избавителя всех,/ и Творца всего мира,/ священницы пойте,//людие, превозносите во вся векиХладом крайним во изгнании истязуют тя, Иоанне / оляденевшии совестию богоборнии, / не могуще коснутися в тебе духа теплейшаго глубины, / се – посланий лучами согреваеши присных, // превозносящих с тобою Христа во веки

Во своя возвращаешися, Иоанне, / се же новое с присными ти предлежит поприще: / лишение всяческих, крайняя нищета. / Се – лютуют безчеловечнии, дух обаче мужается твой: / и в бедах и нуждах Подвигоположника Всемилостива // превозносиши во вся веки.

Благословим:

Ад земный в небесный ти прелагается рай, / преуранену сердцем и преискушену, / да искушаемыя укрепиши ны, Иоанне, / с тобою поющия и превозносящия о тебе // Христа во веки вся.

И ныне:

Ликов небесных и новомученик похвала, / Дево Мати Господня, / тех приимши воздыхания, / взыщи ны, погибающия, // не остави милостию.

Песнь 9

Ирмос: Благословен Господь Бог Израилев, воздвигнувый рог спасения нам, в дому Давида отрока Своего, милосердия ради милости, в нихже посети нас Восток с высоты, и направил ны есть на путь мира.

Утеши малодушныя, безчинныя вразуми, / верою укрепи ны, Иоанне пастырю наш, // на путь мира настави.

Правдою вооружи ны, отче святый, / упованием огради, / заступи немощныя, // на путь мира настави

Слава:

О тебе хвалимся, о тебе дерзаем, отче святый, во смирении любовию зовем ти: не остави ны благостию, на путь мира настави.

И ныне:

Юже возлюбила еси святонаследницу Русь, / сохрани ю в правей вере незыблему, // се бо дом та наречеся Твой, Богородице.

Светилен:

Се Иоанн светильник ясен светит, вся озаряет образом святаго жития: се ко Христу стезя нам расширяется.

Слава и ныне: Праздника или сей:

Свет возсияти мирови, славу в вышних явити, на земли спасение, Дева Пречистая в Вифлеем грядет.

На хвалитех стихиры 3, глас 5, подобен «Радуйся»:

Радуйся Иоанне пребогате, /

Богоданныя таланты умноживый /

Труды премногими неусыпными, /

Заповедей хранением тщательным, /

Паки в лишениих долготерпением, /

Ныне же воздаянием наслаждаешися: /

Мерою Божиею преутрясенною, /

Прославляя на лоне праведничи //

Троицу Единосущную и Нераздельную. /

Радуйся, о крестоносне Иоанне,/

Ревновавый о благодати церковным светочам:/

Крестителю воздержанием и силою правды,/

Богослову-апостолу всетерпеливою любовию,/

Петру верховному в смирении первенством,/

Павлу же единением духа с паствою,/

Чудотворцу Мирликийску всеусердием/

О всякой присных нужде, да от всех прославится//

Троица Единосущная и Нераздельная./

Радуйся согражданине мучеников, /

Не возмогоша бо от любве тя разлучити Божия,/

Ни изгнание, ни теснота, ни смерть,/

Древним уподобившуся страдальцем/

Жаждою всего себе пожрети Спасу любовию,/

Новомучеником о друже искреннейше Иоанне:/

Павлу светозарну со тезоименником ти Палешским//

Троегласно вечне славящии Троицу Божественну.

Слава, глас 6:

Сиры не остави ны, отче, / Прииди стани с нами, / Настави милостиве, / да возследуем по тебе Спасу Христу.

И ныне: Праздника или сей:

Богородице, Ты еси лоза истинная...