Служба преподобномученику Никанору, архимандриту Перервинскому (память 18.06/01.07)

Категория: Проповеди

Служба преподобномученику Никанору, архимандриту Перервинскому (память 18.06/01.07)

Великая вечерня

На «Господи воззвах» – стихиры на 8, глас 8:

Из глубины воззвах к Тебе, Господи :

Никанора преподобнаго/

Житию зачинающуся -/

От церковна учения/

Почерпает сей премудрость первее,/

Не суди бо издетска ведети что,/

Точию Христа Иисуса,//

И Сего Проста.

Да будут уши Твои:

Никанора достохвальнаго/

Восхождению духовну зачинающуся/

Дом оставль сей по плоти отца/

Исправляет стопы к псалмопения поприщу,/

Не суди бо от юности служити кому,/

Точию Христу Иисусу,//

От небес и земли славословиму.

Аще беззакония назриши:

Никанору, по Бозе дерзающу,/

Преспеяния ищущу о смирении,/

Не довлеет служение среде мира страстей,/

Се - Перервинския обители отверзаются двери сему,/

Яко подвига ревнителю, не ведущу что/

Точию Христа Иисуса,//

И мироудаленна Сего.

Имене ради Твоего:

Никанору образа ангельска,/

Паки служения Стефанова сподобляющуся,/

Миру незримое полагается основание/

Устроению в души обители Духа/

Паки и паки молением непрестанным/

Познающу Божию иноку Христа Иисуса,//

И Сего потаенна благостью.

От стражи утренния до нощи:

Никанору, к вышнему устремлену званию/

Образ красный послушания являющу,/

Добраго сподобляющуся свидетельства,/

Яко красота есть сей звания иноческа,/

Не судит бо о смирении ведети что,/

Точию Христа Иисуса,//

Совершенством недосязаема.

Яко у Господа милость:

Никанору от меры в меру восходящу,/

Благодать пресвитерства восприемлющу/

С неюже и благаго икономства дар,/

Достойно поставляем яко свещник на высоте/

Из глубины воздыхает сердечныя/

Ко Господу Христу Иисусу,//

Человеколюбием крайним снисшедшу нам..

Хвалите Господа вси языцы:

Никанору, о Бозе свидетелю/

Окаянных дней всеомрачения людска,/

Богомерзким губителем злевосхитившим власть,/

Се победу предзря Церкве, адом неодолимыя,/

Испивает блаженный чашу страдания,/

Возследуя до конца Христу Иисусу,//

Яко мних миру умерший.

Яко утвердися милость Его на нас:

Никанору, кротостию в темнице испытану,/

Никанору, крепостию во изгнании неколеблему,/

Никанору, сердечную молитву стяжавшему,/

Всеконечное истязание предлежит,/

Да житием и смертию язвы понесет/

Возлюбленна Христа Иисуса,//

И Сего Распята.

Слава, глас 6:

Бутово, земле святая,/

Бутово, Голгофо Русская,/

Бутово - священный Церкве антиминсе,/

Благодать от небес привлецы,/

Утверждающу верою люди Божия,//

Никанора преподобнаго и всех мученик молитвами.

И ныне: Богородичен:

Кто Тебе не ублажит...

Вход. Чтений 3:

  Притчей чтение

  Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку, и блажен человек, иже пути моя сохранит. Исходи бо мои – исходи живота, и уготовляется хотение от Господа. Сего ради молю вас и предлагаю мой глас сыновом человеческим: яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим и проста обретающим разум. Научу бо вас истине, да будет о Господе надежда ваша, и исполнитеся Духа.

Премудрости Соломони чтение

  Праведник аще постигнет скончатися, в покои будет: осудит же праведник умираяй, живущия нечестивыя. Узрят бо кончину праведнаго, и не разумеют, что совещаша о нем: яко повержет Господь нечестивыя безгласны ниц, и поколеблет их от оснований, и до последнего исчезнут в болезни, и память их погибнет. Приидут бо в помышление согрешений своих ужасни, и обличит их сопротив беззакония их. Тогда станет в дерзновении мнозе праведник пред лицем оскорбивших его, и отметающих труды его. Видевше же его смятутся страхом многим, и ужаснутся о преславном спасении его. Рекут бо в себе кающеся, и в тесноте духа воздохнут, и рекут: сей бе, егоже имехом некогда в посмех, и в притчу поношения безумнии. Житие его вменихом неистово, и кончину его безчестну. Како вменися в сынех Божиих, и во святых жребий его есть; убо заблудихом от пути истиннаго, и правды свет не облиста нам, и солнце не возсия нам. Беззаконных исполнихомся стезь и погибели, и ходихом стези непроходны, пути же Господня не разумехом.

Премудрости Соломони чтение

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их: и еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено, и вмале наказани бывше, великими благодетельствовани будут, яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их, возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиися Нань, разумеют истину, и вернии в любви пребудут Ему, яко благодать и милость в преподобных Его, и посещение во избранных Его.

На литии стихиры, глас 7:

  Никаноре, страдальче безропотне,/ ко Спасу, единому упованию всех, / псаломскую песнь тайнодвижеши, иноче:/ иссше яко скудель, убо крепость моя,/ сонм лукавых одержаша мя, // да не отступиши, яко скорбь близ.

Болезнуя сердцем пастырским/ об овцех, горце разсеянных,/ давидски стеня, изгнанниче,/ ко Спасу, о Никаноре, дыхание твое:/ внидоша воды слезныя до души моея,/ да не постыдятся о мне терпящии Тебе, Господи,// ниже да посрамятся ищущии Тебе.

Поношения поносящих, Боже, Тебе/ нападоша на мя, раба Твоего,/ воздыхаеши терпеливейше,/ аз же, Спасе, к Тебе молитвою:/ не забуди, услыши мя в милости,// ныне убо время благоволения Твоего.

Слава, глас тойже: Се течение совершается,/ Никаноре, агнче, иноче, пастырю,/ исполняеши дух псалмопением:/ услыши мя, Господи, яко блага милость Твоя,/ поношение претерпех Тебе ради, Святый,/ вонми души моей и избави ю, // спасение Твое, Боже, да приимет мя.

И ныне, глас тойже: Разверзающуся на Руси лихолетию,/ плачем вдов и сирот преисполнену,- / мира, в тление злепогруженнаго - / изгоняется Никанор устрелянием - убеленный сединами архимандрит - / да и в небе Русском возсияет звездою новою. / Нам же, светом молитв его просвещаемым,/ да усвоится убо покаяния песнь:/ Свят, Свят, Свят еси, Боже Праведне,// Богородицею помилуй нас.

На стиховне стихиры, глас 2, подобен "Доме Евфрафов":

Земле Рязанская,/

Славная издревле/

О Василии святителе и Романе князе:/

Прозябением красуйся ныне - //

Никанором преподобномучеником.

Праведник, яко финикс процветет:

Николая светоча всемирнаго/

О учении обитель славная,/

Мудраго Платона детище,/

Украшай престольный град//

Памятию Никанора преподобномученика.

Насаждени в дому Господни:

Неприметна весь Волоколамская,/

Спас-Осташево - удел тишайший,/

Некогда доставль пристанище,/

Ныне исплети похвал венец//

Никанору преподобномученику.

Слава, глас и подобен тойже:

Бутово врата небесныя,/

Страшнодивновеликия,/

Кровию праведничею священныя,/

Отверзай Божественныя входы верным,//

Никанора преподобномученика молитвами.

И ныне, глас тойже: О чудесе новаго…

Тропарь, глас 4 :

Неложный ревнитель монашеского жития,/

Славный Перервинский архимандрит/

Исполняет подвиг всежизненный/

Еже в Бутове честным страданием за Христа/

Никанор преподобномученик,//

Молитвенник о душах наших.

НА УТРЕНИ

По 1-м стихословии седален, гл.2:

Псалмопение возлюбив изрядне, / убо и нас, отче святый, свыше настави,/ еже во внутреннем человеце // утвердитися молитвою.

Слава и ныне:

Псалмопевец Тя Царицею нарече, / Яже одесную предстоит Царя и Бога,/ преукрашенна убо добродетельми, // молитвою позлащенна неусыпаемою о нас.

По 2-м стихословии седален, гл.2:

Правило монашеское храня, / Господу Иисусу зовый непрестанно, еже о милости, / ныне убо от вышних снисходя, отче, // милость велию испроси душам нашим.

Слава и ныне:

Покров еси иноком, Дево,/ и супруг честная Одигитрие,/ всем любовию снисходя Матернею, // милость велию испроси душам нашим.

По полиелее седален, гл.2:

Восходя от силы в силу,/ чистоте молитву притяжав,/ вся усовешил еси любовию,/ яже есть совершенства соуз,// еюже помяни нас, отче, милостию.

Слава и ныне:

Чистотою и смирением крайним,/ небо к земли привлекла еси, Дево,/ ныне убо с небес любовию снисходя,// помяни нас, Мати, милостию.

Прокимен, глас 4:

Святым, иже суть на земли Его, удиви Господь вся хотения Своя в них:

Стих:

Предзрех Господа предо мною выну, яко одесную мене есть, да не подвижуся.

Евангелие о Матфея, зачало 36

По Евангелии стихира, глас 6:

Святым иже суть на Руси Святей, / новомучеником преславным / удиви Господь хотение Свое, / еже Церковь Русскую возродити дерзновенным сих ходатайством; / сего ради о уделе своем умоляющу / Никанору архимандриту Перервинску возопиим: // радуйся, и паки радуйся, преподобномучениче!

Канон, глас 7, его́же краегранесие :

Никанора воспою Перервинскую похвалу

Песнь 1

Ирмос: Ма́нием Твои́м/ на земны́й о́браз преложи́ся,/ пре́жде удоборазлива́емое водно́е естество́, Го́споди:/ те́мже немо́кренно пешеше́ствовав Изра́иль,// пое́т Тебе́ пе́снь побе́дную.

Святый преподобномучениче Никаноре, моли Бога о нас:

Никанора яко раба и друга Твоего сподоби воспети подвиг, еже за Тя, Всемилостиве, немощь убо восполни слова, скудость жития.

Святый преподобномучениче Никаноре, моли Бога о нас:

Издетска послушание возлюбив и молитве навык, сие основание победоносно, мудре положил еси всему житию, еже на недвижимем веры камени.

Слава:

К мироудалению зачиная путь, первее дома отлучаешися отча, псалпопением обогащаяся и народу Божию служа, еже во Оренбурге яко чтец благоговейный.

И ныне:

Аннину боголюбиву воспоим, братие, Дщерь яко Деву Чистую и Богоматерь.

Песнь 3

Ирмос: В нача́ле небеса́/ всеси́льным Сло́вом Твои́м утвержде́й, Го́споди Спа́се,/ и вседе́тельным и Бо́жиим Ду́хом всю́ си́лу и́х,// на недви́жимем мя́ ка́мени испове́дания Твоего́ утверди́. 

Святый преподобномучениче Никаноре, моли Бога о нас:

Николо-Перервинская тя приемлет обитель яко трудника Божия, яко благоискусна послушника, учению внимающу духовному.

Святый преподобномучениче Никаноре, моли Бога о нас:

Отрицаешися земныя суеты, ангельский приим чин, обеты воздаеши всежизненны, умирая миру, Никаноре, победы Божия тайнозрителю.

Слава:

Ревностию о подвизе украшен,/ неневедом наставником духовным явлься,/ Стефанова служения, Никаноре, звание приемлеши, // паки и паки созывая к молитве верныя.

И ныне:

Анна достойно Самуила,/ сына раждает молитвы,/ Мариам же неизреченно - Иисуса Превечна// яко Чистоты Божественный Плод.

Седален, гл.2:

Бутырок лютых, Никаноре, поприще прошед/ сугубым дерзновением обогатился еси,/ во еже горькия работы и лютую претерпети смерть // Господа ради.

Слава и ныне:

Тайноводя духом святыя,/ от всякаго зла покрывая их,/ соблюдая тех смиреннодушие, Дево,/ укрепляеши оныя и в смерти мученичестей,// Господа ради.

Песнь 4

Ирмос: О́тча не́дра не оста́вль,/ и соше́д на зе́млю, Христе́ Бо́же,/ та́йну услы́шах смотре́ния Твоего́,// и просла́вих Тя́, Еди́не Человеколю́бче.

Святый преподобномучениче Никаноре, моли Бога о нас:

Верность от мала до велика являя призвания, достоинство, Никаноре, свидетельствуеши к служению высшему, таже во пресвитеры поставлен, светосияеши миру, преподобне.

Святый преподобномучениче Никаноре, моли Бога о нас:

О подвизе молитвы непрестанным/ ненебрежением утверждаяся,/ на высокия во обители возведен послушания,/ мирским, Никаноре, страстем чужд,// светосияеши миру, преподобне.

Святый преподобномучениче Никаноре, моли Бога о нас:

Сердцем предстоя Владыце трепетным,/ чин благоговейна храня служения,/ и о снисхождении к немощным ненебрежеши спасения тех ради,/ потакания чужд страстем,// светосияеши миру, преподобне.

Слава:

Простотою сый чист,/ тверд верою, Никаноре,/ упованием в горняя устремлен,/ яко благодати сын познан любовию,// светосияеши миру, преподобне

И ныне:

О силе Господней/ ликует славословием Аввакум,/ мы же о Боговместимой чистоте Твоей// и смирении, Дево-Мати.

Песнь 5

Ирмос: Но́щь несветла́ неве́рным, Христе́,/ ве́рным же просвеще́ние в сла́дости слове́с Твои́х./ Сего́ ра́ди к Тебе́ у́треннюю,// и воспева́ю Твое́ Божество́.

Святый преподобномучениче Никаноре, моли Бога о нас:

Юже возлюбил еси Матерь Божию,/ Еяже образу Иверскому и во обители/ сугубо припадал еси, Никаноре,/ к Той же и в часовню Кремлевскую на служение призван,// дерзновением обогащаешися.

Святый преподобномучениче Никаноре, моли Бога о нас:

Пастырь речет Фессалонитский,/ яко безчестием сердце истязуется:/ и ты, Никаноре, от богоборных лютости преистязан/ и вселукаваго тех ока, о нестяжателю истинне,// молитвенным убо дерзновением обогащаешися.

Слава:

Егда первое мучение темницею достиже тя/, Божий узниче Никаноре/ яко благословение от небес сия приемлеши,/ но возсиявает миру правда твоя/ яко нестяжателя истинна,// дерзновением обогащенна.

И ныне:

Руб поверженный, речет Исаия,/ всякая правда наша пред Тобою, Господи./ Сего ради смирением зовем Ти:/ презри, Пресвятый неправды людей Твоих,// молитвами Богородицы.

Песнь 6

Ирмос: Плавающаго в молве житейских попечений, / с кораблем потопляема грехи/ и душетленному зверю приметаема,/ яко Иона, Христе, вопию Ти:// из смертоносныя глубины возведи мя.

Святый преподобномучениче Никаноре, моли Бога о нас:

Еже во своя возвращением твоим/ утешается братия, Никаноре,/ ты же, задняя забывая, в предняя простираешися,// слову последуя апостольску.

Святый преподобномучениче Никаноре, моли Бога о нас:

Раны и узы твоя, истязания и клеветы,/ ихже мужеством претерпел еси, Никаноре,/ на игуменство тя возводят во обители// соизволением братии, благословением Патриаршим

Слава:

Ведом подвиг твой, Никаноре, яко сияние светоча на высоте, сего ради яко праведный вес слово твое пред собратиями, ныне обители архимандрите, благословением Патриаршим.

И ныне:

Ионы глас из смертоносныя глубины слышиши, Господи, - и наша дерзновением оскудевших, воздыхания приими, молитвами Богородицы.

Кондак, гл.6:

Никанора, инока преизрядна,/ Никанора пастыря духоносна,/ мученика Бутовска Никанора добропобеднаго,// славу Перервинскую да воспоем вси.

Икос:

Что принесем тебе в похвалу, отче святый, / како испишем изгнания твоя, исповедниче верный, / или како дерзнем внутренний твой уяснити подвиг, Божий иноче? / Слово изнемогает, но дух любовию зовет: // Никанора пречудна воспоем вси.

Песнь 7

Ирмос: Пе́щь о́троцы огнепа́льну/ дре́вле росоточа́щу показа́ша,/ Еди́наго Бо́га воспева́юще, и глаго́люще:// превозноси́мый отце́в Бо́г и препросла́влен.

Святый преподобномучениче Никаноре, моли Бога о нас:

Новая воздвизается волна гонений богоборных,/ яко Никанору и премногим собратиям его/ заключенным быти в Бутырки лютыя,/ но не объят тьма/ Свет упования исповедников,/ из глубины вопиющих:// Боже, благословен еси

Святый преподобномучениче Никаноре, моли Бога о нас:

Судище неправо,/ тягостно от своих си изгнание,/ но и в оных сияет Свет упования исповедников,/ Емуже оныя из глубины вопиют:// Боже Праведне, благословен еси.

Слава:

Казахстанская степь безлюдная/ новую обретает жизнь,/ во еже Никанору со иными исповедники освятити сию/ трудами неусыпными среде глада крайняго,/ паче молитвою непрестанною:// Иисусе, Око недремлющее, благословен еси

И ныне:

Утроенны воды попалишася/ жертвою Илии молитвенною,/ отроков же прохладила во огни от небес роса,/ Ты же, Чистая, Огнь привлекла еси к земли,/ во спасение поющих:// Боже, благословен еси

Песнь 8

Ирмос: Неопальная огню в Синаи причащшаяся купина,/ Бога яви медленноязычному и гугнивому Моисеови,/ и отроки ревность Божия три непреоборимыя во огни певцы показа:/ вся дела Господня Господа пойте, // и превозносите Его во вся ве́ки.

Святый преподобномучениче Никаноре, моли Бога о нас:

Юже взыскал еси тишину молитвенну,/ та, пакивозвращщагося тя во своя,/ сретает яко пустынника волею// в миру неведомем Спас-Осташеве.

Святый преподобномучениче Никаноре, моли Бога о нас:

Пакибытие о Господе обручая,/ се - конечная скорбь сретает многострадальна тя/ осуждением смертным,// еже от богоборных лютости.

Благословим:

Отпущаеши с миром рабы Твоя,/ - со иными собратиями воздыхают в Бутове/ Никанор со Василием сверстницы,/ устреляеми безчеловечными,// Ангелы же на небесех сретаеми.

И ныне:

Храм еси Сыну Твоему Божественну,/ нам же Дверь, в некончаему вводящая жизнь,/ идеже новомученицы славят Тя,// Мати Боголюбивая.

Песнь 9

Ирмос: Нетле́ния искуше́нием ро́ждшая, / и Всехитрецу́ Сло́ву плоть взаимода́вшая, / Ма́ти неискусому́жная Де́во Богоро́дице, / Прия́телище Нестерпи́маго, / Село́ Невмести́маго Зижди́теля Твоего́, / Тя велича́ем.

Святый преподобномучениче Никаноре, моли Бога о нас:

Веру соблюд, подвиг жития скончав,/ стяжал еси венец правды, / убо помяни нашу нищету, / воздохни ко Господу, // Никаноре преподобне.

Святый преподобномучение Никаноре, моли Бога о нас:

Адамантово явив крепкодушие,/ упованием не посрамлен,/ во спасения светлу ризу облеклся еси,/ убо и нас возвесели надеждею,/ воздохни ко Господу, // Никаноре пастырю

Слава:

Любобожественне вся претерпев до конца, / язвами о Возлюбленном украшен,/ любви дерзновением обогатился еси,/ умягчи убо и наша окаменелая сердца,/ воздохни ко Господу,// Никаноре мучениче

И ныне:

Утиши Церкви соблазны, / утоли болезни истаявающих скорбми чад,/ новомученики приим сомолитвенники, // о Царице Боголюбивая.

Светилен, глас 6:

Се Никанор светильник ясен светит,// се - ко Христу стезя нам расширяется.

Слава и ныне:

Се Раба Господня, - рекла еси ко Архангелу, Чистая: и мене сим смирением просвети снисхождением Духа.

На хвалитех – стихиры 4, глас 5, подобен: «Радуйся»:

Хвалите Его на силах Его:

Радуйся, Никаноре, молитвы добрый делатетелю,/

Чина иноческа украшение,/

Древним и новым преподобным единодушен явлься:/

Ревностию о вере - Иосифу чудному,/

Благоговением крайним - того наставнику Пафнутию,/

Силуану же ти сверстнику Афонску - нрава простотою/

Таже Вырицкому старцу - совершенною жертвенностию:/

Свеселитеся убо, плача подвижницы,//

Утешением, еже от Живоначальныя Троицы.

Хвалите Его во гласе трубне:

Радуйся, Никаноре, имя апостольское,/

Пастырю о прелюбезный наш,/

Христа-Спаса ради и Евангелия/

Крест священства верно пронесый,/

О Священном Залоге помышляя присно,/

Радующимся сорадуяся, паче страждущим состражда/

Утешение от Господа разделяя прескорбным: /

Тако от всего ти жития свидетельствовати//

Блаженство милостивых - во Царстве Пресвятыя Троицы.

Хвалите Его в тимпане и лице:

Радуйся, Никаноре, добропобедный новомучениче,/

Сонму пастырей, иже в Бутырках, соузниче,/

Сонму Казахстанску, иже за веру, соизгнанниче,/

Страдалец сонму, иже в Бутове, сопричастниче,/

Во едином часе спострадавый собратиям:/

Василию сверстнику и учителю смиренному,/

Сергию кроткоименному, долготерпеливу житием/

Таже Александру со иным Василием, рано к мученичеству созревшими://

Да купно вси во веки славите Нераздельную Троицу.

Хвалите Его в кимвалех доброгласных, хвалите Его в кимвалех восклицания:

Радуйся и паки радуйся, Никаноре, отче наш,/

Именем явлься и житием победы зритель,/

Юже засвидетельствовал подвигом молитвенным, /

Вкупе и узами, страдании и мученичеством славным:/

Тем тезоименну ти апостолу сонаследник быв:/

Разделяете нам со святыми ученики Христовы и всеми святыми/

От неизмерима богатства вашего/

Благодати дары и великия милости,//

Да славится присно и во веки Живоначальная Троица.

Слава, глас 8:

Никаноре, веру нашу укрепи, Никаноре, утверди ны упованием, Никаноре, вся любовию нам сраствори, да Господу неуклонно последуем крестоношением по стопам святых.

И ныне, глас тойже:

Владычице, приими молитвы раб Твоих, и избави нас от всякия нужды и печали.

Просмотров: 44